Кореяда ўқувчиларга жинсий тажовуз қилишда гумонланган ўзбекистонлик ҳибсга олинди

Жанубий Кореяда 2 нафар бошланғич синф ўқувчисини алдаб, ўз машинага ўтқазиб, жинсий тажовуз қилгани айтилган Ўзбекистон фуқароси ҳибсга олинди. Бу ҳақда “Donga” хабар берди.

Қайд этилишича, мазкур шахс жорий йилнинг 8 апрель куни эрталаб соат 8:40 атрофида Инчхоннинг Ёнсу шаҳридаги бошланғич мактабнинг икки нафар бошланғич синф ўқувчисини – бир ўғил ва бир қизни ўз машинасига ўтқазиб, уларга жинсий тажовуз қилган. Бошланғич синф ўқувчилари машинанинг орқа ўриндиғига ўтирган.

Аниқланишича, гумонланувчи ўқувчилардан йўл сўрашини айтиб, уларни алдаган. Шундан сўнг улар автомашинадан тушиб, мактабга борган ва бу ҳақда ўқитувчисига хабар берган. Ўқитувчининг хабарини олган полиция гумонланувчининг шахсини аниқлаган ва уни шошилинч равишда ҳибсга олган. Ҳозирда тергов ишлари давом этмоқда.

Маълумот учун, Жанубий Корея Жиноят кодексининг 297-моддасига кўра, жинсий зўравонлик учун 3 йилдан умрбодгача қамоқ жазоси берилиши мумкин. Жиноят шафқатсизлик билан ёки қурол ишлатиб содир этилган бўлса, жазо муддати оширилади. Агар жабрланувчи вояга етмаган шахс бўлса, жазо янада оғирлаштирилади. Жиноят кодексининг 305-моддасига кўра, вояга етмаган шахсни зўрлаганлик учун 5 йилдан бошлаб умрбодгача қамоқ жазоси қўлланилади. Агар жабрланувчи 13 ёшдан кичик бола бўлса, минимал жазо муддати 10 йилни ташкил этади.

Эслатиб ўтамиз, аввалроқ болаларни жинсий эксплуатация қилиш мақсадида сотиш айблови бўйича судланган Ўзбекистон фуқароси АҚШдан депортация қилинган эди.