Колумбия Президентига суиқасд уюштирилди (видео)

Колумбия Президенти Густаво Петро унга қарши суиқасд уюштириш режаси фош этилганини маълум қилди. Бу ҳақда “El Tiempo” нашри хабар берган.

Президентга кўра, давлат раҳбари Кордова департаментига вертолётда учиб бораётган вақтида эҳтимолий ҳужум хавфидан қочиб қутулган. 

Президентнинг айтишича, ҳужум унинг вертолёти Кариб денгизи соҳилига қўниши режалаштирилган пайтда амалга оширилиши мумкин эди.

“Тан олишим керак, ўша пайтда суиқасддан қочиб юргандим, шунинг учун вақтида етиб бора олмадим. Белгиланган жойга қўна олмадик. Ҳатто қўниш чироқларини ҳам ёқишмади”, деган у.

Февраль ойи бошларида Колумбия ва АҚШ Президентлари – Густаво Петро ва Дональд Трамп Оқ уйдаги учрашувдан сўнг муносабатлар юмшагани ҳақида хабарлар тарқалган эди. Овал кабинетдан чиққанидан бир неча соат ўтиб берган интервьюсида Колумбия раҳбари учрашувни 10 баллдан 9 баллга баҳолаган.

Бундан аввалроқ, Петро АҚШ томонидан эҳтимолий ҳарбий ҳужум бўлган тақдирда, Колумбияни ҳимоя қилиш учун қурол кўтаришга тайёр эканини билдирган эди. Шунингдек, у Трамп уни Венесуэла Президенти Николас Мадуро каби осонлик билан “ўғирлаб кета олмаслиги”ни ҳам таъкидлаган.