“Кладмен” талаба ва 71 минг доза наркотик: катта жиноий гуруҳ фош бўлди (видео)

Ўзбекистонда наркотик тарқатиш билан шуғулланган трансмиллий жиноий уюшманинг 14 нафар турли даражадаги аъзолари қўлга олинди. Бу ҳақда Ички ишлар вазирлиги хабар берди.

Қайд этилишича, Ички ишлар вазирлиги тезкор-қидирув департаменти ҳамда унинг ҳудудий бўлинмалари, шунингдек, Давлат хавфсизлик хизмати ва Божхона қўмитаси хорижий давлатларнинг ҳуқуқни муҳофаза қилувчи органлари билан ҳамкорликда Тошкент шаҳрининг Чилонзор, Юнусобод, Янгиҳаёт, Бектемир ва бошқа ҳудудларида олтита йўналишда кенг қамровли тезкор-қидирув тадбирлари ўтказилган.

Ўтказилган тезкор комбинациялар натижасида дастлабки йўналишда 2005 йилда туғилган, нуфузли олий таълим муассасасининг учинчи босқич талабаси интернет нарко-дўконда “кладмен” сифатида ишлаб келгани ва унинг бошқарувидаги Onix русумли автомашина Янгиҳаёт тумани ҳудудидаги постда тўхтатилиб текширилганда, автомашинанинг салон қисмига яширилган 500 грамм альфа-ПВП синтетик гиёҳвандлик воситаси борлиги аниқланган ва процессуал тартибда расмийлаштириб олинган.

Тезкор тадбирларнинг иккинчи йўналишида эса жиноий уюшманинг Наманган вилоятида фаолият юритиб келган аъзоси қўлга олинган. Тезкор-қидирув тадбирлари давом эттирилиб, жиноий шерикларнинг ҳар бири ўзаро боғланган ягона наркотармоқнинг бўғинлари сифатида фош этилган.

Тезкор тадбирларнинг халқаро йўналишдаги ҳамкорлик натижасида эса мазкур трансмиллий жиноий уюшманинг етакчиларидан бири хорижий давлат ҳудудида яшириниб юргани аниқланиб, шу давлатнинг ҳуқуқни муҳофаза қилувчи органлари томонидан қўлга олинган.

Трансмиллий жиноий уюшманинг Ўзбекистон ҳудудидаги фаолиятига алоқадор шахсларни аниқлашга қаратилган тезкор-қидирув тадбирлари натижасида, жиноий уюшманинг етти нафар омборчиси ва ушбу омборчиларга ишлаган олти нафар “закладчик”, шунингдек, уюшма етакчиларидан бири қўлга олинган.

Ўтказилган тезкор тадбирлар натижасида трансмиллий жиноий уюшманинг жами 14 нафар турли даражадаги аъзолари қўлга олиниб, улардан 71 минг 433 та бир маротабалик дозага тенг бўлган 2 килограмм 500 грамм альфа-ПВП синтетик гиёҳвандлик воситаси процессуал тартибда расмийлаштириб олинган.

Билдирилишича, мазкур ҳолат юзасидан қўлга олинган барча жиноий уюшма аъзоларига нисбатан Жиноят кодексининг 273-моддаси (гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 6-қисми билан жиноят иши қўзғатилиб, қамоқ эҳтиёт чораси қўлланилган.

Эслатиб ўтамиз, аввалроқ Тошкент вилоятида ички ишлар ходимларининг тўхташ ҳақидаги қонуний талабига бўйсунмай, қочишга уринган Cobalt ҳайдовчисининг автомашинасидан 4 килограммдан ортиқ гашиш аниқланганди.