КХДР Жанубий Корея чегарасида артиллерияларини кўз-кўз қилди

Шимолий Корея Жанубий Корея билан чегара яқинида ўзини ўзи ҳаракатлантирувчи артиллерия қурилмасини жойлаштирди. Бу ҳолат икки мамлакат ўртасида сентябрь ойидаги мина портлаши юзасидан БМТ Хавфсизлик Кенгашига юборилган мурожаатлар фонида кузатилмоқда. Бу ҳақда “Reuters” хабар берди.

Агентлик мухбири бугун, 26 октябрь куни Жанубий Корея ҳудудидаги кузатув майдончасидан чегара яқинида турган Шимолий Корея артиллерия қурилмасини кўрган. “Yonhap” қурилмани 122 миллиметрли, ўзини ўзи ҳаракатлантирувчи гаубица деб таърифлаган. Шунингдек, чегара яқинида жануб томонга қаратилган қуроллари бор учта бронетехника ва демилитаризация қилинган ҳудудда тўсиқлар ўрнатаётган 20–30 нафар шимолий кореялик аскар кузатилган.

Кённам университети профессори Лим Иль Чхольнинг фикрича, Шимолий Кореянинг артиллерия қурилмасини бундай очиқ намойиш қилиши одатий ҳол эмас. Унинг айтишича, бу ҳаракат Пхеньяннинг чегара сиёсатида мулоқотдан кўра куч ишлатишга таяниш ниятини кўрсатиши мумкин.

Кескинликка сабаб бўлган воқеалардан бири жорий йилнинг 21 сентябрь куни демилитаризация қилинган ҳудудда мина портлаши бўлган. Жанубий Корея томони ҳодиса Шимолий Корея ҳарбийлари ўрнатган мина туфайли юз берганини ва бу Корея уруши давридаги сулҳ келишувини бузишини билдирган.

Портлаш оқибатида уч нафар жанубий кореялик ҳарбий жароҳатланган. Пхеньян эса бу ҳодисага алоқадорлигини рад этган. Шимолий Кореянинг БМТдаги вакили жорий йилнинг 25 октябрь куни Хавфсизлик Кенгашига мактуб йўллаб, Сеулни мина ҳодисасидан ўз чегара сиёсатига қарши фойдаланишда айблаган.

Пхеньян, шунингдек, ўз суверенитети бузилиши ўзини ҳимоя қилиш чораларига сабаб бўлиши мумкинлигини билдирган. Жанубий Корея Бирлашув вазирлиги вакили Шимолий Корея мактуби Пхеньяннинг аввалги позициясини такрорлашини айтган. Сеул чегарадаги кескинликни юмшатиш учун Пхеньян билан мулоқот ўтказишни таклиф қилган.

Маълумотларга кўра, сўнгги йилларда Шимолий Корея ҳарбийлари ҳарбий демаркация чизиғи яқинида тактик йўллар қуриш, тўсиқлар ўрнатиш ва мина жойлаштириш ишларини олиб бормоқда. 2015 йилда ҳам чегарада Шимолий Корея миналари портлаши оқибатида Жанубий Корея ҳарбийлари жароҳатланган ва бу икки давлат ўртасида ҳарбий қарама-қаршилик кучайишига олиб келган эди.

Эслатиб ўтамиз, аввалроқ Шимолий Корея сувости кемаларидан учирилиши мўлжалланган қанотли ракеталарни синовдан ўтказгани ҳақида хабар берилган эди.