Киркнинг беваси эрининг ишини давом эттирмоқчи (видео)

Америкалик машҳур ўта ўнгчи фаол ва блогер Чарли Киркнинг беваси Эрика Юта штатидаги митинг чоғида ўлдирилган турмуш ўртоғининг сиёсий фаоллигини давом эттиришга ваъда берди. Бу ҳақда у кеча, 12 сентябрь куни интернетда жонли эфирда берган баёнотида маълум қилди.

“Эрим қурган ҳаракат ўлмайди. Ўлмайди. Мен бунга йўл қўймайман”, деди Эрика Кирк.

Эрика Кирк эрининг подкастларни ёзиб оладиган бўш ўриндиғи ёнида туриб, турмуш ўртоғининг ўлимига сабабчи бўлган “ёвузлар” ҳақида шундай деди:

“Эримнинг ўлдирилишида айбдорлар нима қилганини тушунишмайди. Улар бу аёлда қандай олов ёққанликларини билишмайди. Бу бева аёлнинг фарёди уруш фарёди каби дунё бўйлаб эшитилади”.

Эрика Кирк Чарлининг ҳаётини қаҳрамонларча сақлаб қолишга ҳаракат қилган биринчи ёрдам кўрсатувчиларга, шунингдек, полиция ходимларига миннатдорлик билдирди.

“Мен биринчи навбатда эримнинг қотилини топиш учун тинимсиз меҳнат қилган маҳаллий, штат ва федерал ҳуқуқ-тартибот идораларига минатдорлик билдирмоқчиман”, деди у.

Бундан ташқари, бева аёл АҚШ Президенти Дональд Трамп, АҚШ вице-президенти Жеймс Дэвид Вэнс ва эрига “ғамхорлик кўрсатган” барча тарафдорларига минатдорлик билдирди.

“Мен Президент Трамп ва унинг ажойиб оиласига ўз минатдорлигимни билдирдирмоқчиман. Жаноб Президент, эрим сизни ҳурмат қиларди ва сиз ҳам уни ҳурмат қилишингизни билар эди. Сизнинг дўстлигингиз ажойиб эди. У сизни қўллаб-қувватлаганидек, сиз ҳам уни жуда яхши қўллаб-қувватладингиз” деди Эрика Кирк.

Кирк хоним эрининг оиласига бўлган муҳаббатини ҳам алоҳида эътиборга олди.

“Энг муҳими, Чарли ўз фарзандларини яхши кўрарди. У мени бутун қалби билан севарди” деди Эрика Кирк.

Аниқланишича, Эрика Кирк ва унинг бир ёшли ўғли, уч ёшли қизи эри отиб ташланган вақтда томошабинлар орасида бўлган. 

Маълумот ўрнида, Эрика Кирк тадбиркор ва Miss Arizona USA танлови ғолибаси бўлиб, ҳозирда Библия тадқиқотлари бўйича докторлик диссертациясини ҳимоя қилмоқда. У турмуш ўртоғи билан 2018 йилда танишган.

Маликабону Муҳаммедова