Ким Ғарб давлатларини кескин огоҳлантирди

Корея Халқ Демократик Республикаси (КХДР) етакчиси Ким Чен Ин Ғарб давлатларига кескин огоҳлантириш билан чиқди. Бу ҳақда Марказий телеграф агентлиги хабар берди.

Унинг айтишича, агар АҚШ ва унинг иттифоқчилари Россияга қарши ҳужум қилса, Шимолий Корея Қуролли кучлари зудлик билан ҳаракатга ўтади. Кимнинг таъкидлашича, бу Пхеньяннинг муқаддас бурчи ҳисобланади.

“Агар АҚШ ва Ғарб хизматкорлари ўзларининг арзон ва сифатсиз қуроллари билан биродаримиз Россияга ҳужум қилиш ниятидан воз кечмаса, мен ҳеч иккиланмасдан КХДР армиясини ишга солиш бўйича буйруқ бераман. Бу корейс-рус шартномасининг руҳига мувофиқ амалга ошади”, деди у.

Ким, шунингдек, Шимолий Корея армиясининг Россия тарафида урушда иштирокини “иттифоқчилик мажбуриятини адо этиш” деб баҳолаган. У Шимолий Корея аскарлари Россия армияси билан “бир хандақда туриб, умумий душманга қарши курашганини” таъкидлаган. Шунингдек, КХДР ҳукумати ҳозирда Киевнинг ҳаракатларини диққат билан кузатаётганини қўшимча қилган.

Қайд этиш жоиз, 2024 йилнинг июнь ойида Россия Президенти Владимир Путин Шимолий Кореяга ташриф буюрганди. Ўшанда имзоланган стратегик ҳамкорлик шартномаси ўтган йили кузда ратификация қилинди. Ушбу ҳужжатга кўра, томонлардан бирига қуролли ҳужум қилинса, иккинчи томон ҳарбий ва бошқа шаклларда дарҳол ёрдам кўрсатишга мажбур.

Жанубий Корея разведкасининг маълумотларига кўра, КХДР Россия томонида урушга 15 минггача аскар юборган. Улар, асосан, Курск вилоятида жанг қилган. 4000 нафардан ортиғи ҳалок бўлган ёки яраланган, бу эса уларнинг замонавий урушга тайёр эмаслигидан дарак беради. Жорий йилнинг апрель ойида Шимолий Корея армиясининг урушда қатнашганини расман тан олди.

“Reuters” хабарига кўра, Шимолий Корея Россия артиллериясининг ярмига яқин снарядларни етказиб бермоқда. Баъзи қисмларда бу кўрсаткич 100 фоизгача етади, яъни улар бутунлай КХДРга боғлиқ бўлиб қолган. Шу билан бирга, Россия Президентининг матбуот котиби Дмитрий Песков Россия ҳам агар зарурат туғилса, КХДРни ҳарбий жиҳатдан қўллаб-қувватлашга тайёр эканини билдирган.

Эслатиб ўтамиз, аввалроқ 600 га яқин шимолий кореялик Россиянинг Украинага қарши урушида, хусусан, Россия Федерациясининг Курск вилоятидаги ҳарбий амалиётларда иштирок этиш чоғида ҳалок бўлгани хабар қилинганди.