Ким Чен Ин Шимолий Кореяга қайтди

КХДР Давлат ишлари раиси Ким Чен Ин Хитойга ташрифини якунлаб, Пхеньянга қайтди. Бу ҳақда Корея марказий ахборот агентлиги хабар берди.

2 сентябрь куни КХДР Ташқи ишлар вазирлиги Ким Чен Ин Пекинга Хитой халқининг Япония агрессиясига қарши қаршилик кўрсатиш урушидаги ғалабанинг 80 йиллигига бағишланган тантаналарда иштирок этиш учун келганини маълум қилди. Бу Ким Чен Иннинг Хитойга бешинчи ташрифи эди. Унга амалдорлардан ташқари, қизи Чжу Э ҳам ҳамроҳлик қилди.

Ким Чен Иннинг Хитойга аввалги ташрифи 2019 йилнинг январь ойида бўлган эди. КХДР ва Хитой ўртасидаги сўнгги саммит 2019 йил июнь ойида Пхеньянда бўлиб ўтган эди.

Пекинда Хитой халқининг Япония агрессиясига қарши курашдаги ғалабасининг 80 йиллигига бағишланган парадда Ким Чен Ин ХХР етакчисининг чап томонида, Россия Президенти Владимир Путин ўнг томонида жой олди.

Ким Чен Ин Пекинга ташрифи давомида Си Цзиньпин ва Владимир Путин билан учрашувлар ўтказди.