Ким Чен Ин армиясининг отишмаларини кузатди

Шимолий Корея етакчиси Ким Чен Ин Корея Халқ Демократик Республикаси армиясининг артиллерия ўқ отиш машғулотларини кузатди. Бу ҳақда Корея марказий телеграф агентлиги хабар берди.

Маълумотларга кўра, у Корея Халқ армияси таркибидаги йирик бўлинмалар ўртасида ўтказилган миномёт экипажлари мусобақасида иштирок этган.

Машғулотларда ҳарбийлар табиий ва сунъий тўсиқлардан тез ўтиш, тезкор жойлашиш, шартли нишонларни йўқ қилиш, шунингдек яшириниш ва тактик режага мувофиқ чекиниш кўникмаларини намойиш этган.

Тадбирда мамлакат ҳарбий раҳбариятининг юқори лавозимли вакиллари, жумладан Мудофаа вазири Но Гван Чхол ва бош штаб раҳбари Ли Ён Гил ҳам қатнашган.

Нашр маълумотига кўра, ҳарбийлар миномёт бўлинмаларининг жанговар самарадорлиги ва тўлиқ жанговар шайлигини намойиш этган. Ким Чен Ин мусобақа натижаларидан мамнунлигини билдирган, ҳарбийларга миннатдорлик изҳор этган ҳамда армияда жанговар тайёргарликни янада кучайтириш зарурлигини таъкидлаган.

Шунингдек, у келгусида ҳарбий бўлинмалар ўртасида янада рақобатбардош ва интенсив мусобақалар ўтказиш бўйича кўрсатмалар берган.

Мусобақа якунларига кўра, биринчи ўринни 11-корпусга қарашли бўлинма, иккинчи ўринни 2-корпус, учинчи ўринни эса 91-корпус эгаллаган.

Эслатиб ўтамиз, аввалроқ КХДР Ракетасозлик бош бошқармаси “ер-ер” синфига кирувчи модификацияланган “Хвасонпхо-11ра” тактик баллистик ракеталарини синовдан ўтказганди.