Ким Чен Ин ядро қуролининг тепкисини 13 яшар қизига топширди

Шимолий Корея етакчиси Ким Чен Ин ўзининг кичик қизи Ким Чжу Эни мамлакат Ракета маъмуриятида раҳбарлик лавозимига тайинлади. Ушбу маъмурият Пхеньяннинг ядровий ва баллистик ракета дастурларини назорат қилади. Бу ҳақда жорий йилнинг 23 февраль куни “Chosun Daily” хабар берди.

Тахминан 13 ёшда экани айтилаётган Ким Чжу Э сўнгги йилларда отасига ракета синовлари ва ҳарбий тадбирларда тез-тез ҳамроҳлик қилмоқда. Кузатувчилар бу ҳолат унинг Ким Чен Иннинг эҳтимолий вориси сифатида тайёрланаётганидан далолат бериши мумкинлигини таъкидламоқда. Бу эса Шимолий Кореяда анъанавий равишда эркак меросхўрлар устун бўлган сулолавий тизим учун ноодатий ҳолат ҳисобланади.

Хабарларга кўра, Чжу Э генераллардан кўрсатмалар олаётгани, айрим ҳолатларда эса буйруқлар ҳам бераётгани айтилмоқда. Жанубий Корея Миллий разведка хизмати ҳам уни эҳтимолий меросхўр сифатида баҳолаган ва вазиятни диққат билан кузатиб бораётганини билдирган. Шу билан бирга, Ким Чен Ин Корея Меҳнат партиясининг бош котиби этиб яна қайта сайланганди. У бу лавозимни қарийб 15 йилдан буён эгаллаб келмоқда. Партиянинг тўққизинчи съездида унинг раҳбарлиги тўлиқ қўллаб-қувватлангани таъкидланган.

Таҳлилчиларга кўра, ворислик масаласида ҳали аниқ қарорлар мавжуд эмас. Мамлакат ичидаги сиёсий кучлар мувозанати, жумладан Ким Чен Иннинг синглиси Ким Ё Жонгнинг таъсири ҳам бу жараёнга таъсир кўрсатиши мумкин.

Мазкур ўзгаришлар Корея ярим оролидаги хавфсизлик вазиятига ҳам таъсир кўрсатиши мумкин. Сўнгги йилларда Шимолий Кореянинг ядровий ва ракета дастурлари сабабли Сеул ва Пхеньян ўртасидаги муносабатлар кескинлашган.

Эслатиб ўтамиз, аввалроқ Ким Чен Ин қизи билан Россия–Украина уруши пайтида ҳалок бўлган шимолий кореялик аскарлар оилалари учун Пхеньянда қурилган янги уйларнинг очилиш маросимида иштирок этганди.