Kim Chen In yadro qurolining tepkisini 13 yashar qiziga topshirdi

Shimoliy Koreya yetakchisi Kim Chen In o‘zining kichik qizi Kim Chju Eni mamlakat Raketa ma’muriyatida rahbarlik lavozimiga tayinladi. Ushbu ma’muriyat Pxenyanning yadroviy va ballistik raketa dasturlarini nazorat qiladi. Bu haqda joriy yilning 23 fevral kuni “Chosun Daily” xabar berdi.

Taxminan 13 yoshda ekani aytilayotgan Kim Chju E so‘nggi yillarda otasiga raketa sinovlari va harbiy tadbirlarda tez-tez hamrohlik qilmoqda. Kuzatuvchilar bu holat uning Kim Chen Inning ehtimoliy vorisi sifatida tayyorlanayotganidan dalolat berishi mumkinligini ta’kidlamoqda. Bu esa Shimoliy Koreyada an’anaviy ravishda erkak merosxo‘rlar ustun bo‘lgan sulolaviy tizim uchun noodatiy holat hisoblanadi.

Xabarlarga ko‘ra, Chju E generallardan ko‘rsatmalar olayotgani, ayrim holatlarda esa buyruqlar ham berayotgani aytilmoqda. Janubiy Koreya Milliy razvedka xizmati ham uni ehtimoliy merosxo‘r sifatida baholagan va vaziyatni diqqat bilan kuzatib borayotganini bildirgan. Shu bilan birga, Kim Chen In Koreya Mehnat partiyasining bosh kotibi etib yana qayta saylangandi. U bu lavozimni qariyb 15 yildan buyon egallab kelmoqda. Partiyaning to‘qqizinchi s’ezdida uning rahbarligi to‘liq qo‘llab-quvvatlangani ta’kidlangan.

Tahlilchilarga ko‘ra, vorislik masalasida hali aniq qarorlar mavjud emas. Mamlakat ichidagi siyosiy kuchlar muvozanati, jumladan Kim Chen Inning singlisi Kim Yo Jongning ta’siri ham bu jarayonga ta’sir ko‘rsatishi mumkin.

Mazkur o‘zgarishlar Koreya yarim orolidagi xavfsizlik vaziyatiga ham ta’sir ko‘rsatishi mumkin. So‘nggi yillarda Shimoliy Koreyaning yadroviy va raketa dasturlari sababli Seul va Pxenyan o‘rtasidagi munosabatlar keskinlashgan.

Eslatib o‘tamiz, avvalroq Kim Chen In qizi bilan Rossiya–Ukraina urushi paytida halok bo‘lgan shimoliy koreyalik askarlar oilalari uchun Pxenyanda qurilgan yangi uylarning ochilish marosimida ishtirok etgandi.