Ким бош вазир ўринбосарини эчки билан таққослаб ишдан ҳайдади

КХДР раҳбари Ким Чен Ин мамлакат бош вазир ўринбосарини машинасозлик соҳасидаги муаммолар сабаб ишдан бўшатди. Шимолий Корея етакчиси мансабдорни эчкига қиёслаган. Бу ҳақда CNN хабар берди.

Шимолий Корея раҳбари Ким Чен Ин машинасозлик соҳаси учун жавобгар бўлган бош вазир ўринбосари Ян Сон Хони мамлакат шимолий-шарқида жойлашган Ренсон машинасозлик мажмуасини модернизация қилиш ишлари жараёнида “кераксиз, сунъий тарзда яратилган бетартиблик”ка сабабчи бўлганликда айблаган.

Ким Чен Иннинг айтишича, лойиҳа “масъулиятсиз ва нокас” амалдорлар туфайли сезиларли иқтисодий йўқотишларга учраган. У, шунингдек, 2025 йил декабрь ойида бўлиб ўтган партия йиғилишида ҳам бу масалалар юзасидан Ян Сон Хони танқид қилганини, кейин эса уни диққат билан кузатиб борганини, аммо у мутлақо жавобгарлик ҳиссини сезмаётганини аниқлаганини айтган.

“Агар образли қилиб айтсак, у ҳўкизлар аравсига қўшиб қўйилган эчкига ўхшарди. Биз бунга кадрларни тайинлаш амалиётимиздаги тасодифий хато сифатида қарашимиз керак”, дейди КХДР раҳбари.

Эслатиб ўтамиз, аввалроқ Ким Чен Ин Россияда хизмат вазифаларини бажариб қайтган армия муҳандислик бўлинмаси учун ўтказилган кутиб олиш маросимида иштирок этганди.