Кичик ҳисоблар, катта драматизм: Ла Лигада 12-тур якунланди

Кеча, 9 ноябрь оқшомида Испания Ла Лигасининг 12-туридан ўрин олган учрашувлар якунланди. Бу турда турнир жадвали пешқадами “Реал Мадрид” кутилмаган тарзда “Райо Вальекано” майдонида нурсиз дуранг қайд этди. Ўз рақибларининг очко йўқотишидан унумли фойдаланган “Барселона” эса “Сельта” майдонида ғалаба қозонди.

Турнинг барча учрашувлари тафсилотлари билан танишинг:

“Эльче” 1:1 “Реал Сосьедад” 

“Эльче” ўз майдонида яхши ҳаракат қилди. Мезбонлар учрашув сўнгига қадар ғалабани сақлаб келаётган эди, бироқ “Реал Сосьедад” охирги дақиқаларда ҳужуми орқали пенальти ишлаб чиқди ва ундан унумли фойдаланиб, дуранг натижа билан учрашувни якунлади.

“Жирона” 1:0 “Алавес” 

“Жирона” мухлислари қаршисида ўз имкониятидан унумли фойдаланди ва якунда битта гол билан ғалаба қилди. “Алавес” ҳужумда бир неча имконият яратишга ҳаракат қилди, аммо улар самарасиз якунланди.

“Севилья” 1:0 “Осасуна” 

Бу учрашувда ҳам “Севилья” минимал ҳисобда ғалаба қозонди. “Осасуна” ҳимояси кучли эди, лекин битта голдан кейин жамоа жавоб беролмади.

“Атлетико Мадрид” 3:1 “Леванте” 

Диего Симеоне шогирдлари ҳужумда фаоллик кўрсатиб, учта гол уришга муваффақ бўлди. “Леванте” эса бир гол билан жавоб берди, аммо рақиб ҳимоясининг мустаҳкамлиги туфайли ҳисобни ўзгартиролмади.

“Эспаньол” 0:2 “Вильярреал” 

“Вильярреал” сафарда кучли ўйин кўрсатди ва икки гол билан ғалаба қозонди. “Эспаньол” учун ушбу натижа кетма-кет иккинчи мағлубият бўлди.

“Атлетик Бильбао” 1:0 “Реал Овьедо” 

“Атлетик Бильбао” битта гол билан ғалаба қозонди. “Реал Овьедо” ҳимояда бироз заиф кўринди ва ҳужумларда имконият ярата олмади, натижада жамоа мағлубиятга учради.

“Райо Вальекано” 0:0 “Реал Мадрид” 

“Реал Мадрид” Чемпионлар лигасидаги мағлубиятдан сўнг “Райо Вальекано” устидан ишончли ғалаба қозониши тахмин қилинган эди, бироқ Хаби Алонсо шогирдлари кутилмаганда меҳмонда нурсиз дуранг қайд этди.

“Валенсия” 1:1 “Реал Бетис” 

Ушбу учрашувда ҳар икки жамоа ҳам имконият яратишга ҳаракат қилди. Учрашувнинг иккинчи бўлимида ҳисоб очилди, аммо кўп ўтмай “Реал Бетис” ҳисобни тенглаштирди.

“Мальорка” 1:0 “Хетафе” 

Ушбу турда кичик ҳисобдаги ғалабалар кўп бўлди. Улардан бири “Мальорка”–“Хетафе” учрашуви бўлиб, мезбонлар 1:0 ҳисобида ғалаба қозондилар. “Хетафе” ҳужумда имкониятдан унумли фойдалана олмади.

“Сельта” 2:4 “Барселона” 

Пешқадамнинг очко йўқотишидан “Барселона” унумли фойдаланди. Каталонияликлар сафарда “Сельта” дарвозасига 4 та гол урди ва етакчи билан очколарини 3 очкога қисқартирди. “Сельта” эса биринчи бўлимда 2 та гол урганига қарамай, якунда 3 очкони йўқотди.

Маълумот учун, якунланган турдан сўнг “Реал Мадрид” 31 очко билан пешқадамликни давом эттирмоқда. “Барселона” эса ушбу турдаги ғалабаси билан пешқадам билан очколарини 3 очкога қисқартирди. Навбатдаги тур учрашувлари халқаро танаффусдан сўнг, 22 ноябрь куни бошланади.