Хотинини ёқиб юборишга уринган эркак ушланди

Бугун, 6 февраль куни Қирғизистоннинг Талас вилоятида эркак хотинига бензин сепиб, уни ёқиб юборишга уринишда гумонланиб қўлга олинди. Бу ҳақда вилоят полиция бошқармасига таяниб, “Спутник Қирғизистон” хабар берди.

Маълумотларга кўра, кеча, 5 февраль куни 27 ёшли аёл полицияга мурожаат қилиб, 2025 йил 15 октябрь куни эри билан боғлиқ оғир зўравонлик ҳолати содир бўлганини билдирган. Унинг сўзларига кўра, эри сабабсиз жанжал кўтарган, уни уйдан ҳайдаб чиқарган, сўнгра бензин сепиб, ёқиб юбормоқчи бўлган.

Полициянинг билдиришича, 2025 йил октябрь ойида маҳаллий ички ишлар ходимларига тураржойда ёнғин чиққани ҳақида хабар келиб тушган. Ҳодиса ёнғинлар журналида қайд этилган ва гувоҳлар сўроқ қилинган. Дастлабки маълумотларда ёнғин печкани ёқиш вақтида бензин ишлатилгани сабабли чиққани айтилган. Ҳодиса оқибатида эр-хотиннинг иккиси ҳам куйиш жароҳати олган ва реанимация бўлимига ётқизилган. Уларнинг аҳволи оғир бўлгани сабабли ўша пайтда сўроқ қилишнинг имкони бўлмаган.

Аёлнинг айтишича, у ҳодисадан кейин узоқ вақт давомида қариндошларига ҳам, ҳуқуқни муҳофаза қилиш органларига ҳам мурожаат қилмаган.

Унинг такрорий мурожаатидан сўнг Жиноят кодексининг 130-моддаси (Оғир тан жароҳати етказиш) бўйича жиноят иши қўзғатилган. Гумонланувчи қўлга олиниб, вақтинчалик сақлаш ҳибсхонасига жойлаштирилган. 

Эслатиб ўтамиз, аввалроқ Тошкентнинг Чилонзор туманида сохта косметолог жуфтликнинг фаолияти тўхтатилганди. Эр ва хотин кўп қаватли турар-жой биносининг ертўласида юз жарроҳлик амалиётларини ўтказиб келган.

Жамшидбек Амиров