Хоманаий илк бор Эрондаги нотинч вазият ҳақида гапирди (видео)

Бугун, 3 январь куни Эрон Олий раҳнамоси Оятуллоҳ Али Хоманаий биринчи марта мамлакатда бир ҳафтадан ортиқ вақтдан бери давом этаётган оммавий норозилик намойишлари ҳақида очиқ гапирди. Бу ҳақда “Tasnim” хабар берди.

Қайд этилишича, Оятуллоҳ Али давлат телевидениесида сўзлаган нутқида у воқеаларни “ички ва ташқи душманларнинг фитнаси” деб атаган ва “тартибсизликларни қўзғатувчилар”нинг ҳаракатларига қаттиқ қаршилик кўрсатишни талаб қилган.

“Биз душман олдида чекинмаймиз. Биз душманни тиз чўктирамиз. Миллий валютанинг қадрсизланиши ва беқарор валюта курси туфайли бозор савдогарларининг норозилик намойишлари оқланади, аммо қўзғатувчиларни ўз ўрнига қўйиш керак ”, деган Эрон Олий раҳнамоси.

 

АҚШда жойлашган Инсон ҳуқуқлари фаоллари янгиликлар агентлигининг хабар беришича, норозилик намойишлари аллақачон мамлакатнинг 31 вилоятидан 22 тасида 100 дан ортиқ шаҳар ва қишлоқларга тарқалган. Инқирозга оғир иқтисодий вазият сабаб бўлган: Эрон риали бир долларга тахминан 1,4 миллионга тушган, шу билан бирга расмийларнинг Исроил билан уруш ва АҚШнинг Эрон ядровий иншоотларига зарбаларидан кейин иқтисодиётни барқарорлаштиришга уринишлари муваффақиятсизликка учраган.

Вақт ўтиши билан кўчалардаги шиорлар очиқчасига сиёсий тус олган – намойишчилар ҳозирги режимига қарши чиқмоқда ва бир нечта шаҳарларда меросхўр Шоҳ Ризо Паҳлавийнинг қайтишини талаб қилмоқда. Сўнгги хабарларга кўра, намойишларни тарқатиш пайтида камида 10 киши ҳалок бўлган.

Вазият кескинлашган бир пайтда АҚШ Президенти Дональд Трамп агар Эрон расмийлари “тинч намойишчиларни ўлдирса”, Вашингтон аралашиши мумкинлиги ҳақида огоҳлантирган, Теҳрон эса Яқин Шарқдаги АҚШ кучларига қарши зарбалар билан таҳдид қилган.

Эслатиб ўтамиз, аввалроқ Эронда оғир иқтисодий вазият ва юқори инфляция фонида бошланган беш кунлик норозилик намойишлари чоғида 6 киши ҳалок бўлгани ва 17 киши жароҳат олгани ҳақида хабар берилганди.