ХОҚ президенти лавозимига илк бор аёл киши сайланди

Зимбабвелик икки карра олимпия чемпиони Кирсти Ковентри Халқаро Олимпия Қўмитасининг (ХОҚ) ўнинчи президенти этиб сайланди. У ушбу лавозимни эгаллаган илк аёл ва Африка қитъасидан бўлган биринчи вакил бўлди.

Сайловлар Грециянинг Коста-Наварино курортида бўлиб ўтган ХОҚнинг 144-сессиясида ўтказилган. ХОҚ президенти саккиз йилга сайланади. Ковентри ушбу лавозимда 2013 йилдан буён ХОҚни бошқариб келган немис Томас Бах ўрнини эгаллайди ва 24 июнь куни иш бошлайди.

“Сиз мени танлаб тўғри қарор қабул қилганингизга ишонч ҳосил қилишингиз учун қўлимдан келган барча ишни қиламан. Сиз мен билан фахрланасиз”, деди Ковентри ва ўз номзодини илгари сурган рақибларига миннатдорчилик билдирди.

Маълумот учун, 41 ёшли Ковентри Афина ва Пекин Олимпиадаларида 200 метр масофага чалқанча сузиш бўйича ғолиб чиққан. Унинг ҳисобида тўртта кумуш ва битта бронза Олимпия медали, шунингдек, жаҳон чемпионатларида учта ғалаба бор.

2013-2021 йилларда у ХОҚ спортчилар комиссиясининг аъзоси, 2023 йилдан эса ижроия қўмитаси аъзоси бўлган. 2018 йилдан буён Зимбабве Спорт вазири лавозимини эгаллаб келмоқда. 2017-2024 йилларда у Халқаро сёрфинг федерацияси вице-президенти, 2014-2021 йилларда эса Бутунжаҳон антидопинг агентлиги (WADA) спортчилар комиссияси аъзоси бўлган.

Ковентридан ташқари ХОҚ вице-президенти, испаниялик Хуан Антонио Самаранч, Иордания шаҳзодаси Файсал ибн Ҳусайн, халқаро спорт федерациялари раҳбарларидан британиялик Себастьян Коу (Енгил атлетика федерацияси – World Athletics), япониялик Моринари Ватанабе (Гимнастика федерацияси – FIG), франциялик Давид Лапартьян (Велоспорт федерацияси – UCI), швециялик Йохан Элиаш (Чанғи спорти ва сноуборд федерацияси – FIS) номзодлари илгари сурилганди.

Регламентга кўра, номзод ғалаба қозониш учун овоз берувчиларнинг 50 фоизидан ортиғининг қўллаб-қувватловига эга бўлиши керак. Агар биринчи босқичда бундай натижа қайд этилмаса, энг кам овоз олган номзод четлатилиб, янги босқич ўтказилади. Номзодлар ва овоз берувчилар сайлов жараёнининг аниқ натижалари ҳақида билмайди – улар фақат якуний босқичда эълон қилинади. Агар якуний босқичда икки номзод тенг овоз олса, қўшимча босқич ўтказилади. Агар икки тур натижасида ҳам тенглик сақланса, амалдаги ХОҚ президенти ҳал қилувчи овозга эга бўлади.

Бирор номзод мутлақ кўпчилик овозини олган заҳоти сайлов якунланган деб эълон қилинади ва янги ХОҚ президенти номи эълон қилинади. Шундан кейин сайлов натижалари оммага ошкор қилинади.

Эслатиб ўтамиз, аввалроқ Халқаро Олимпия қўмитасининг (ХОҚ) 144-сессиясида бокс спорт тури 2028 йил Американинг Лос-Анежелес шаҳрида бўладиган Олимпиада ўйинлари дастурига киритилгани хабар қилинганди.