Хитойлик эркак чумолилар сабаб 1 йилга қамалди

Кенияда суд 2200 дан ортиқ тирик чумолиларни ноқонуний олиб чиқмоқчи бўлган хитойлик фуқарони 12 ойга озодликдан маҳрум қилди ва унга 1 миллион кения шиллинги миқдорида жарима тайинлади. Бу ҳақда CNN хабар берди.

Айбланувчи Чжан Кэцюнь Найробидаги халқаро аэропортда қўлга олинган. Унинг юкларидан 2200 дан зиёд тирик чумолилар топилган. Улар орасида айниқса қимматбаҳо ҳисобланган Messor cephalotes туридан 1948 таси бўлган.

Маълумотларга кўра, чумолилар пробиркаларга жойланган ҳолда яширинча олиб чиқилмоқчи бўлган ва кейинчалик Хитойга юборилиши режалаштирилган. Бундай ҳашаротлар коллекционерлар орасида машҳур бўлиб, улар махсус шаффоф формикарийларда сақланади.

Аввалига айбини рад этган Чжан Кэцюнь кейинчалик уни тан олган. Судья Ирэн Гичоби бу ҳукм чумолилар контрабандаси каби ҳолатларнинг олдини олиш учун қаттиқ чора сифатида қабул қилинганини таъкидлаган.

Мутахассисларнинг таъкидлашича, сўнгги йилларда олиб чиқиш фақат йирик ҳайвонлар (масалан, фил суяги) билан чекланиб қолмай, балки экотизим учун муҳим бўлган кичик турларга – жумладан чумолиларга ҳам тарқалмоқда.

Эслатиб ўтамиз, аввалроқ Бразилияда олимлар азалдан маълум бўлган энг кичик умуртқали жонзотлардан бири – чумоли жуссаси билан тенг бўлган қурбақани топилганди.