Хитой ЕИнинг Ўзбекистонга алоқадор ташаббусидан ташвишда

Хитой ҳукумати Европа Иттифоқи билан савдо соҳасидаги келишмовчиликларни бартараф этиш ва Брюсселнинг янги бир томонлама санкциялар жорий этишдан воз кечишига умид қилмоқда. Бу ҳақда мамлакат Ташқи ишлар вазирлиги вакили Го Цзякунь икки томон ўртасида Хитойдан камёб ер металларининг экспорти устидан назоратни кучайтириш билан боғлиқ музокаралар арафасида ўтказилган брифингда маълум қилди.

“Биз Европа Иттифоқидан ўзбошимчалик билан чекловлар киритишдан тийилишини умид қиламиз. Европа Иттифоқи барча мамлакат компаниялари учун адолатли, шаффоф ва камситишсиз бизнес шароитларини таъминлаши, бозор иқтисодиёти ва Жаҳон савдо ташкилоти қоидаларини амалда қўллаб-қувватлаши лозим”, дейди у.

Хитойлик дипломатнинг таъкидлашича, Хитой ва Европа ўртасидаги савдо-иқтисодий алоқаларнинг моҳияти ўзаро тўлдирувчанлик ва манфаатдорликка асосланади. У Брюсселни “савдо зиддиятларини диалог ва маслаҳатлар орқали ҳал этишга қатъий интилишга” чақирган.

“Биз Европа Иттифоқи эркин савдони қўллаб-қувватлаш ва протекционизмга қарши чиқиш бўйича ўз мажбуриятларига амал қилишига умид қиламиз”, дейди Го Цзякунь.

Қайд этиш жоиз, Хитой Ташқи ишлар вазирлиги вакилининг ушбу баёноти Европа комиссияси раиси Урсула фон дер Ляйен Европа Иттифоқининг Хитойдан муҳим хомашё етказиб беришга боғлиқлигини камайтириш ташаббусини эълон қилганидан сўнг янгради. Ляйеннинг сўзларига кўра, Брюссель бу бўшлиқни Ўзбекистон, Австралия, Қозоғистон, Канада, Украина ва Чили билан алоқаларни мустаҳкамлаш орқали тўлдирмоқчи.

Жорий йилнинг 9 октябрь куни эса Хитой Савдо вазирлиги камёб ер металларининг экспорти, улар билан боғлиқ технологиялар ва қазиб олиш ускуналари устидан назоратни кучайтириш бўйича бир нечта ҳужжатларни эълон қилган. Эндиликда бу маҳсулотларни экспорт қилиш учун махсус лицензия талаб этилади. Бу чоралар АҚШ ва Европа Иттифоқининг норозилигига сабаб бўлди. Жорий йилнинг 23 октябрь куни ўтказилган Европа Иттифоқи саммитида Франция Президенти Эммануэль Макрон Хитой ушбу чекловларни юмшатмаса, унга нисбатан “энг қаттиқ санкциялар” жорий этишни талаб қилди.