Хитой ва АҚШ дунёнинг икки супер кучи, учинчиси йўқ – Алиев

north_east

“Ишимизга аралашманг!” Алиев Туркия ва Эрдўғанга “намёк” қилдими?

Хитой ва АҚШ дунёнинг икки супер кучи, учинчиси йўқ. Шунингдек, ушбу мамлакатлар ўртасида муайян масалалар муҳокама қилинади ва рақобат мавжуд. Бу ҳақда жорий йилнинг 2 октябрь куни Озарбайжон Президенти Илҳом Алиев “Янги Озарбайжон” партиясининг VIII съездида гапирди.

“Бизда Европа Иттифоқига аъзо кўплаб мамлакатлар билан стратегик шериклик тўғрисидаги декларация ва шартномалар мавжуд. Озарбайжон 10 та аъзо мамлакат билан шундай форматга эга. Айтишим мумкинки, сўнгги вақтларда иккита тарихий воқеа содир бўлди: биз Хитой ва Америка билан стратегик шериклик муносабатларини ўрнатдик”, дейди Алиев. 

Озарбайжон Президентининг айтишича, Хитой билан Ҳар томонлама стратегик шериклик тўғрисидаги декларация, Америка Қўшма Штатлари билан эса Стратегик хартия имзоланган. Булар дунёнинг икки супер кучи, учинчиси йўқ – бу ҳақиқат. Албатта, ушбу мамлакатлар ўртасида муайян масалалар муҳокама қилинади ва рақобат мавжуд. Мазкур мамлакатлар томонидан қоидаларнинг ягона тушуниш асосида белгиланиши бутун дунё учун энг муҳим омил бўлиши мумкин.  

“Ана шу икки давлат билан Озарбайжон стратегик шерик ҳисобланади. Яъни аҳолимиз, ҳудудимиз у қадар катта эмас. Бу нима? Бу – бизга бўлган ишонч, бизга бўлган муносабат, сўзимизга бўлган ишончдир. Дунёда сўзимизнинг қиймати имзомиз билан бир хил эканини билмайдиган ҳеч ким қолмади. Айтилган барча нарсани бажарамиз. Биз ҳеч қачон қўшалоқ ўйинлар ўйнамаганмиз. Ҳеч бир мамлакатга нисбатан ҳеч қачон иккиюзламачилик, мунофиқлик қилмаганмиз. Гарчи бундай муносабатга бир неча бор дуч келган бўлсак-да ва бугун ҳам дуч келишда давом этмоқдамиз. Бироқ биз ҳеч қачон улар каби бўла олмаймиз. Биз – ўзини ҳурмат қиладиган инсонлармиз, биз қадр-қиммат билан яшаймиз ва сиёсатимизни муносиб тарзда олиб борамиз. Бизнинг мисолимизда ҳар бир киши бунинг имкони борлигига ишонч ҳосил қилиши мумкин”, дейди Озарбайжон етакчиси. 

У мисол сифатида Озарбайжон бир ўзи душманни мағлубиятга учратганини, душманга ўз шартларини ўтказганини айтган.

“Бир ўзинг душманни мағлубиятга учратиш, душманга ўз шартларингни ўтказиш, 30 йил давомида сенга азоб-уқубат етказганига қарамай, уни капитуляция тўғрисидаги далолатномани имзолашга мажбур қилиш ва сўнг керакли пайтда тўхташ, бошқа қон тўкилмаслиги учун тинчликка эришиш. Чункий бизга абадий уруш керак эмас, бу бизнинг танловимиз эмас эди. Иккинчи Қорабоғ урушида биз керакли вақтда тўхтадик ва 2023 йил сентябрида ҳам керакли вақтда тўхтадик. Гарчи турли вариантлар бўлган бўлса-да. Бироқ айнан узоқни кўра билиш, стратегик фикрлаш ва халқимизнинг асосий манфаатларини ҳисобга олиш шундай сиёсатни белгилайди.

Сиёсатда ҳис-туйғуларга ўрин йўқ. Агар ҳис-туйғуларга берилганимизда, бугун, эҳтимол, учинчи Ғалаба аркасини Ереван марказида тиклаган бўлар эдик”, дейди давлат раҳбари.

Маълумот учун, кеча, 2 октябрь куни Бакудаги Ҳайдар Алиев марказида ҳукмрон “Янги Озарбайжон” партиясининг VIII съезди бўлиб ўтди. Партиянинг туман ва шаҳар ташкилотларидан съездга 960 нафар делегат сайланган. VIII съездга тайёргарлик кўриш доирасида 7 сентябрдан 19 сентябргача партиянинг 84 та маҳаллий ташкилотида ҳисобот конференциялари бўлиб ўтган ва уларда жами 16 239 киши иштирок этган.

Эслатиб ўтамиз, Илҳом Алиев ушбу съездда Қорабоғдаги уруш учун барча айбни Арманистоннинг аввалги раҳбарияти зиммасига юклаб бўлмаслигини, бироқ мамлакат собиқ раҳбарларининг барчаси ҳарбий жиноятчилар ва муносиб жазоларини олишлари кераклигини, шунингдек, мамлакат ҳарбий ғалабаларга ўз кучи билан эришганини айтган эди.