Хитой фуқаролик флотини Тайванга қарши операцияга тайёрламоқда – ОАВ

Хитой Тайванга қарши эҳтимолий ҳарбий операцияни қўллаб-қувватлашга қодир йирик фуқаролик флотини сафарбар қилмоқда. Бу ҳақда “Reuters” суриштирув эълон қилди.

Нашр кемалар ҳаракати бўйича тракинг маълумотлари ва сунъий йўлдош тасвирларини ўрганиб, тайёргарлик кўлами Иккинчи жаҳон урушидаги Нормандия операциясидан ҳам ошиши мумкин, деган хулосага келган.

Журналистлар ёзги ҳарбий машғулотларда иштирок этган юздан ортиқ фуқаролик кемаларининг ҳаракатини таҳлил қилган. Жорий йилнинг 17 август куни содир бўлган бир эпизодда 12 та кема – паромлар ва юк кемалари Гуандун провинцияси қирғоқларига йўл олиб, техникани тўғридан тўғри қирғоққа тушира бошлаган. Халқ-озодлик армиясининг машғулотлари чоғида юк кемаларидан оғир ҳарбий техникани шундай усулда тушириш илк бор ҳужжатлаштирилган.

Денгиз операциялари бўйича экспертлар баҳосига кўра, Хитойнинг ҳаракатлари босқин сценарийларининг аниқ ишланаётганини кўрсатади. Техникани тушириш учун фуқаро юк кемаларидан фойдаланиш Хитойнинг қирғоқда тезкор тарзда куч жойлаштириш имкониятларини сезиларли кенгайтиради. Шунингдек, “Reuters” йиғма понтон вақти-вақти билан йиғиладиган ва автоматик ҳаракатланадиган қўниш тизими қўлланганини ҳам қайд этган. Бу тизим вақтинчалик кема қабул қилиш чизиғини бир неча соатда йиғишга имкон беради ва очиқ денгизда қўшин ва техникани тушириш жараёнини тезлаштиради.

Хитой қонунчилиги давлатга фуқаро кемаларини ҳарбий эҳтиёжлар учун назоратга олиш ҳуқуқини беради. АҚШ ва Тайвань экспертларининг фикрича, Хитой армияси тахминан 20 минг аскардан иборат биринчи тўлқинни ташиш имкониятига эга. Бироқ тўлиқ миқёсдаги операция учун бундан анча катта контингент керак бўлади, шу сабабли фуқаро флотининг иштирокига катта эътибор қаратилмоқда.

Хитой Ташқи ишлар вазирлиги Тайвань масаласи мамлакатнинг ички иши эканини ва Пекин можарони тинч йўл билан ҳал қилишга интилаётганини билдирган. Тайвань эса фуқаро кемаларининг ҳаракати доимий равишда кузатилаётганини, фавқулодда ҳолатлар учун махсус режалар ишлаб чиқилганини маълум қилган.

Эслатиб ўтамиз, аввалроқ Хитой Шинжон-Уйғур автоном районида жойлашган ва 1964 йилда Хитойнинг биринчи атом бомбаси синаб кўрилган асосий ядровий синов полигонини тез суръатлар билан кенгайтираётгани ва модернизация қилаётгани ҳақида хабар берилган эди.