Хави учун курашга яна бир Италия гранди қўшилди

“Барселона”нинг собиқ бош мураббийи Хави Италиянинг “Ювентус” клубини бошқариши мумкин. Бу ҳақда “El Nacional” хабар берди.

Италия клуби Тиаго Мотта бошчилигидаги омадсиз мавсумдан сўнг мураббийни ўзгартирмоқчи ва Хави Моттанинг ўрнига асосий номзодлардан бири ҳисобланади. Испаниялик мутахассис эса “Юве” “Барселона” ярим ҳимоячиси Фермин Лопесни ўз сафига қўшиб олса, Турин клуби таклифига рози бўлиши мумкин.

Ўз навбатида каталонияликлар Ферминни сотилмайдиган футболчилар қаторига қўшиб қўйган, бироқ футболчининг ўзи Хави билан ишлаш вариантини кўриб чиқиши мумкин.

Қайд этиш жоиз, Хави 2024 йил 30 июнь куни “Барселона”ни тарк этган ва ўшандан бери ишсиз.

Маълумот учун, 27 та турдан сўнг “Ювентус” А Серия турнир жадвалида пешқадам “Интер”дан 6 очко ортда қолиб, 4-ўринда бормоқда. Жамоа 1/16 финал босқичида ҳам ПСВга ютқазиб, Европа Чемпионлар лигасидан чиқиб кетди.

Эслатиб ўтамиз, аввалроқ “Милан” Хавини мураббийлик постига олиб келмоқчи эканлиги хабар қилинганди.