Хави фаолиятини Италияда давом эттириши мумкин

Италиянинг “Милан” клуби келаси мавсум учун бош мураббий изламоқда. Пауло Фонсека ёмон натижалар туфайли ишдан бўшатилди ва унинг ўрнига келган Серхио Консейсао умидли старт олиб, Италия Суперкубогини қўлга киритди. Аммо кейинги воқеалар кўрсатганидек, жамоанинг муаммолари тўлиқ ҳал этилмади ва шунинг учун “Сан-Сиро” эгалари мураббийлик постига испаниялик Хавини олиб келиш эҳтимолини кўриб чиқмоқда. Бу ҳақда “El Nacional” хабар берди.

Манбага кўра, Консейсао “россонерилар”ни бошқаришда давом этиши учун ўз натижаларини сезиларли даражада яхшилаши керак бўлади. Клубда директорлар кенгашига анча ишонарлироқ кўринадиган номзод аллақачон кўзда тутилган. Бу Хави Эрнандес, у деярли бир йил олдин “Барселона”дан кетганидан кейин ҳамон ишсиз.

Ўз навбатида 45 ёшли Хави ҳам “россонерилар”ни мураббий сифатида бошқариш вариантини қўллаб-қувватлаши мумкин.

Маълумот учун, А Сериянинг ортда қолган 26 та туридан кейин “Милан” 41 очко билан 8-ўринда бормоқда. Жамоани Европа Чемпионлар лигасига йўлланма берувчи 4-ўриндан 8 очко ажратиб турибди. Чемпионат якунланишига эса 12 та тур қолди.