Хави “Барселона”нинг сўнгги 15 йилликдаги энг омадсиз иккинчи мураббийига айланди

“Барселона”нинг амалдаги бош мураббийи Хави сўнгги 15 йилдаги ғалабалар нисбати бўйича каталонияликлар тарихидаги иккинчи энг ёмон мураббий бўлди. Бу ҳақда футбол журналисти Фран Мартинес ўз X саҳифасида маълум қилди.

Хавининг “кўк-анорранглилар” бошқарувидаги ғалабаси 62,16 фоиз кўрсаткични ташкил қилди. Ҳатто клубнинг собиқ устози Кике Сетьен ҳам ўтказилган ўйинларнинг 64 фоизида ғалаба қозонган. Бу кўрсаткич бўйича Хави фақат нидерландиялик мураббий Рональд Кумандан (58,2%) олдинда.

Испания Ла Лигасида ўтказилган 16 турдан сўнг “Барселона” 34 очко жамғариб, турнир жадвалида 4-ўринни эгаллаб турибди. Каталонияликлар пешқадам “Жирона”дан 7 очко ортда қолмоқда.

Маълумот учун, Хави 2021 йилнинг ноябрида “Барселона”ни бошқармоқда ва жамоа билан 2024 йилнинг ёзига қадар шартнома имзолаган эди. 2022/2023 йилги мавсумда каталонияликлар 43 ёшли мутахассис бошчилигида Испания чемпионлигини қўлга киритди ва мамлакат Суперкубогига эга чиқди.