Харбинда нима гаплар? 

Айни кунларда Хитойнинг Харбин шаҳрида IX қишки Осиё ўйинлари баҳслари ўтказилмоқда. Ҳозиргача кўплаб ўзбекистонлик спортчилар мусобақаларда ўз имкониятларини синовдан ўтказди.

Шорт-трек бўйича Ўзбекистон терма жамоаси аъзоси Даниил Ейбог Ўзбекистон делегациясининг Харбин-2025 қишки Осиё ўйинларидаги иштирокини бошлаб берди. 1500 метр масофага кечган пойганинг чорак финалида қатнашган Ейбог 2:30:60 дақиқалик натижа билан ярим финалга йўл олди. 500 метр масофада кечган саралаш дастурида эса Ейбог 41.143 сония, 1000 метр масофада эса 1:29:268 дақиқа билан ҳар икки йўналишда чорак финалга йўл олди. Ейбог иккала йўналишда ҳам ўз гуруҳида иккинчи бўлиб марра чизиғини кесиб ўтди. Даниил Ейбог қишки Осиё ўйинларининг 500 метр масофага кечган баҳсларида еттинчи натижани қайд этди. Шунингдек, у 1500 метр масофада ҳам иштирок этди. Бироқ унинг ярим финалдаги натижаси медаллар учун курашишга етарли бўлмади. 1000 метр масофага кечган баҳсда Даниил 1:27:705 дақиқа билан ўз гуруҳида тўртинчи бўлди. Бироқ бу ярим финал йўлланмаси учун камлик қилди. Шу билан Ўзбекистон вакилининг қишки Осиё ўйинлардаги иштироки якунланди.

Тоғ чанғиси бўйича Ўзбекистон терма жамоаси аъзолари ҳам қишки Осиё ўйинларидаги иштирокини бошлади. Бироқ слалом йўналишида кечган аёллар ўртасидаги баҳслар ўзбекистонлик спортчилар учун кўнгилдагидек ниҳоясига етмади. Якунда Сабина Режепова 15, Валерия Ковалёва 17, Мария Морова 23-натижани қайд этишди. Ксения Григорева 2-чиқишида трассада хатога йўл қўйгани учун дисквалификация қилинди. 

Эркаклар ўртасида кечган слалом дастурида Арман Гаюпов 6, Никита Горковский 14-натижани қайд этди. Медет Назаров эса баҳс давомида белгиланган йўналишдан чиқиб, иштирокини тугата олмади.

Конькида югуриш бўйича Ўзбекистон терма жамоаси аъзоси Данила Семериков 5000 метр масофага кечган баҳсда стартга чиқди. У 6:39.71 дақиқа қайд этиб, мусобақани олтинчи поғонада якунлади.

Қишки Осиё ўйинлари доирасида чанғи альпинизми бўйича ўзбекистонлик спортчилар ҳам стартга чиқди, аммо баҳсларда Ўзбекистон вакилларидан омад юз ўгирди ва улар шоҳсупага кўтарила олмади.