Кениядаги мактаб ётоқхонасида даҳшатли ёнғин бўлди

Кенияда қизлар мактабида кеча, 28 май куни юз берган йирик ёнғин оқибатида 16 нафар ўқувчи ҳалок бўлди, яна ўнлаб киши жароҳат олди. Ҳодиса Гилгил шаҳридаги Utumishi Girls Academy мактабида содир бўлган, полиция бу воқеани “эҳтимолий атайлаб уюштирилган ёнғин” сифатида текширмоқда. Бу ҳақда BBC хабар берди.

Расмий маълумотларга кўра, ёнғин кеча, 28 май куни тонг саҳарда, Найробидан тахминан 120 километр шимоли-ғарбда жойлашган мактаб ётоқхонасининг юқори қаватида бошланган. Олов тезда тарқалиб, 135 та икки қаватли каравот жойлашган бинони қамраб олган. Ҳодиса вақтида ётоқхонада юзлаб ўқувчилар бўлган.

Полиция терговлари давомида мактабдаги CCTV камералар ёзувлари ўрганилган ҳамда ўқувчилар ва ходимлар билан суҳбатлар ўтказилган. Натижада 8 нафар ўқувчи ёнғинни режалаштириш ва амалга оширишда “асосий гумонланувчилар” сифатида аниқланиб, ҳибсга олинган. Улар дастлаб мактаб ҳудудидан чиқиб кетгани ва кейинчалик қайтиб ушлангани ҳам маълум қилинган.

Тергов доирасида яна 30 нафар ўқувчи сўроқ қилиниб, ҳодиса тафсилотлари аниқлаштирилган. Полиция ёнғиннинг аниқ сабаби ҳали тўлиқ тасдиқланмаганини, бироқ барча версиялар, жумладан атайлаб ёқиш эҳтимоли ҳам кўриб чиқилаётганини билдирган.

Таълим вазири Жулиус Огамба мактабда жиддий хавфсизлик қоидалари бузилганини тасдиқлаган. Унинг айтишича, ётоқхоналарда ҳаддан ташқари кўп ўқувчи жойлаштирилган, айрим чиқиш эшиклари эса ёпиқ бўлган. Бу эса ёнғин вақтида эвакуацияни мураккаблаштириб, катта талафотга сабаб бўлган. Вазирлик мактаб бошқарув кенгашини тарқатиб юборди ҳамда мактаб директори ва масъул шахсларга нисбатан интизомий ва ҳуқуқий чоралар кўрилишини маълум қилди. Расмийлар хавфсизлик стандартларини бузган ҳар қандай шахс жавобгарликка тортилишини таъкидламоқда.

Ҳодиса жойида ота-оналар ва қариндошлар яқинларидан хабар олиш умидида тўпланган. Гувоҳларнинг айтишича, мактаб ҳудудида тартибсизлик ва чуқур қайғу ҳукм сурган. Айрим ота-оналар фарзандларининг тақдиридан бехабар қолаётганини, баъзилар эса уларнинг шифохонага ёки ўликхонага олиб кетилганини эшитганини айтмоқда.

Жароҳатланган 79 нафар ўқувчидан бир қисми оғир аҳволда бўлиб, етти нафари махсус даволаниш учун Найробига жўнатилган. Қолганлар эса шифохоналарда даволаниб, айримлари уйларига чиқарилган.

Ҳалок бўлганларнинг жасадлари аниқлаш учун DNK экспертизасига юборилган.

Расмийлар ушбу фожиа бўйича тергов давом этаётганини ва барча айбдорлар аниқланиб, қонун олдида жавоб беришини билдирмоқда. Ҳодиса эса мамлакат таълим тизимидаги хавфсизлик стандартлари қай даражада муҳим эканини яна бир бор кун тартибига олиб чиққан.