Канада Томас Партига виза беришдан бош тортди

Гана терма жамоасининг ярим ҳимоячиси Томас Парти Торонтода бўлиб ўтадиган Жаҳон чемпионатидаги илк учрашувни ўтказиб юборади. FIFA’нинг “The Athletic” нашрига маълум қилишича, футболчига Канада ҳудудига киришга рухсат берилмаган. 

Қайд этилишича, Парти июнь ойи бошида Қўшма Штатларга кирган бўлса-да, Канадага боришига рухсат берилмаган.

2025 йилда Лондон полицияси футболчини 2020–2022 йиллар оралиғида, у “Арсенал” сафида тўп сурган вақтда содир этилган 7 та зўрлаш ва бир марта жинсий тажовуз ҳолати бўйича айблаган эди.

Томас Парти ўз айбини рад этган. Мазкур иш бўйича суд муҳокамаси 2027 йилда ўтказилиши мумкин.

Гана терма жамоаси мундиалдаги иштирокини 18 июнь куни Торонтода Панамага қарши ўйин билан бошлайди. Шундан сўнг, жамоа Англияга қарши АҚШнинг Фоксборо шаҳрида, Хорватияга қарши эса Филадельфияда майдонга тушади.

FIFA ўз баёнотида мезбон давлатларнинг иммиграция жараёнлари, жумладан, виза ва мамлакатга кириш билан боғлиқ қарорларига аралашмаслигини таъкидлади.

Маълумот учун, 32 ёшли Томас Парти Гана терма жамоаси сафида 57 та учрашувда иштирок этиб, 15 та гол урган.