Камилла Раҳимова Майами турнирини муваффақиятли бошлади

Кеча, 16 март куни АҚШнинг Майами шаҳрида WTA 1000 тоифасига кирувчи “Miami Open” турнири старт олди. Мусобақанинг саралаш босқичи дастлабки баҳсида Камилла Раҳимова ғалаба қозонди.

Умумий мукофот жамғармаси 9 млн 415 минг 725 долларни ташкил этадиган турнирнинг саралаш баҳсларида Ўзбекистоннинг биринчи ва иккинчи ракеткалари – Камилла Раҳимова ҳамда Мария Тимофеева ҳам кортга чиқди. 

Камилла Раҳимова дастлабки саралаш баҳсида франциялик Леолия Жанжанга қарши кортга чиқди. Биринчи сетни тай-брекда бой берган Раҳимова кейинги икки сетда қайтиш амалга ошириб 6/7(1), 7/5, 6/0 ҳисобида ғалаба қозонди. 

Мария Тимофеева эса саралашнинг дастлабки учрашувида австралиялик Лулу Сунга 4/6, 6/7(5) ҳисобида имкониятни бой берди ва мусобақадаги иштирокини якунлади.

Энди бугун, 17 март куни Раҳимова турнирнинг асосий босқичига йўлланма берувчи баҳсида дунёнинг 68-ракеткаси, австралиялик Талиа Гибсонга қарши кортга чиқади.