Камилла Раҳимова дунёнинг энг кучли 50 теннисчиси қаторига кирди

Ўзбекистоннинг биринчи ракеткаси Камилла Раҳимова Халқаро аёл теннисчилар ассоциацияси (WTA) рейтингида 22 поғона юқорилаб, дунёнинг 44-ракеткасига айланди. Бу ҳақда WTA’нинг янгиланган рейтингида кўриш мумкин.

Раҳимова бу натижага Япониянинг Токио шаҳрида ўтказилаётган WTA 500 турнирида ярим финалга қадар етиб боргани эвазига эришди. Шунингдек, у Мария Тимофеевани ортда қолдириб, Ўзбекистоннинг биринчи ракеткаси мақомини қайтариб олди. Бу Камилла учун фаолиятидаги энг юқори рейтинг натижаси ҳисобланади.

Ўзбекистоннинг иккинчи ракеткаси Мария Тимофеева ҳам рейтингда икки поғона кўтарилиб, 70-ўринни эгаллади. Мамлакатнинг учинчи ракеткаси Полина Кудерметова эса ўтган ҳафтага нисбатан икки ўрин пастлаб, 93-поғонадан жой олди.

WTA рейтинги кучли ўнлигида ҳам бир қатор ўзгаришлар кузатилди. Америкалик теннисчилар Коко Гофф ва Жессика Пегула ўзаро ўрин алмашди. Чехиялик Линда Носкова 9-ўриндан 8-поғонага кўтарилди, польшалик Ига Свёнтек эса аксинча, 8-ўриндан 9-поғонага тушди.

Қозоғистонлик Елена Рибакина WTA рейтингида пешқадамликни сақлаб қолди. Кучли учликдан беларуслик Арина Соболенко ва россиялик Мирра Андреева ҳам жой олган.