Кабаевадан тортиб Абрамовичгача. Зеленский 2,5 минг россияликни “қора рўйхат”га киритди

Бугун, 20 октябрь куни Украина Президенти Владимир Зеленский Миллий хавфсизлик ва мудофаа кенгашининг россиялик ишбилармонлар, жумладан, “Новатэк” раҳбари Леонид Михельсон, Аркадий Ротенберг, Михаил Прохоров, Роман Абрамович, сенатор Сулаймон Керимов ва бошқаларга нисбатан санкциялар бўйича қарорини кучга киритди. Бу ҳақда Президент сайтида эълон қилинган ҳужжат матнида айтилади.

Бундан ташқари, тадбиркорлар Владимир Лисин, Татьяна Бакалчук, Год Нисанов, Самвел Карапетян, Дмитрий Риболовлев, Елена Батурина, Араз Агаларов, Евгений Касперский, шунингдек, Ирина Винер-Усмонова, Дарья Жукова ва бошқаларга нисбатан санкциялар қўлланилган.

Шунингдек, рўйхатда Элла Памфилова, Алина Кабаева (Путиннинг маъшуқаси), Андрей Патрушев, Артур ва Александр Дугин, Тина Канделаки, Константин Эрнст, Иван ва Игор Сечин, Владислав Деинего (тан олинмаган ЛХР Ташқи ишлар вазири), Андрей Фурсенко, Александр Залдостанов, Владислав Сурков, Лев Хасис, Михаил Мизинцев, Николай Панков, Павел ва Лилия Ротенберг, спортчилар Александр ва Федор Емелианенко, Евгений Плушенко бор. Тасдиқланган рўйхатга Украинада йирик активларга эга бўлган Олег Дерипаска ва “Альфа-Банк” ҳамтаъсисчиси Михаил Фридман киритилмаган, бироқ унинг иккита қизи бор.

Украина Президенти Владимир Зеленский, шунингдек, Россия юридик шахслари, жумладан, “Ростелеком”, “Альфабанк”, Россия тўғриан-тўғри инвестициялар жамғармаси, “Русгидро” ва “Алроса”га нисбатан ҳам санкциялар киритди.

Бундан ташқари, Россия Федерацияси Президенти Администрацияси, Россия Федерацияси Президенти Администрациясининг “Россия” махсус парвоз отряди” Федерал давлат унитар корхонаси, “Росгосстрах”, “Қозон вертолёт заводи” ОАЖ, “Камаз” АЖ, “Сухой фуқаролик самолётлари” ОАЖ, Москва кредит банкига санкция киритилди.

Рўйхатда жами 1374 та компания бор. Жисмоний шахслар рўйхатида 2507 нафар фамилия мавжуд. Санкциялар беш ва 10 йил муддатга қўлланилади.