Қурманбек Бакиев келиб, судда жавоб берсин – Президент маслаҳатчиси

Қирғизистон Президенти маслаҳатчиси Чўлпонбек Абикеев мамлакатнинг собиқ давлат раҳбари Қурманбек Бакиевнинг Қирғизистонга қайтиб келиб, суд олдида жавоб беришини талаб қилди. Бу ҳақда у “Кабар” ахборот агентлигига берган интервьюсида айтди.

Абикеевга кўра, 7 апрель воқеалари учун жавобгарлик нафақат Бакиев, балки муваққат ҳукумат зиммасига юкланганини яшириб бўлмайди.

“Ўқлар олддан эмас, орқадан келдими, ким ўқ узди, деган саволлар жавобсиз қолмоқда. Мен уларни собиқ президент Алмазбек Атамбоев отди, деб тўғридан тўғри даъво қилмаяпман, лекин у Форум биносига қуролланган ҳолда келганини ҳамма билади. Агар Бакиев келса, у албатта судга тортилади. 7 апрелдан кейин содир этилган ўғирликлар, уйдан ғойиб бўлган сандиқлар, Максимнинг уйидан ғойиб бўлган пуллар ва сейфлардан олинган маълумотлар. Бакиев ва унинг қариндошлари фош бўлади”, деди у.

Давлат раҳбари маслаҳатчиси ўша воқеаларда иштирок этган кўплаб шахслар гувоҳ сифатида сўроққа чақирилишини қўшимча қилди.

“Натижада янги фактлар пайдо бўлиши мумкин ва кўпчилик фош бўлади. Масалан, Асқар Акаевнинг қайтишига қарши чиққанлар ҳам бор. Аммо сўроқдан кейин кўплаб жиноятлар фош этилди. Бир неча юқори мансабдор шахслар иштирокидаги жиноий ҳаракатлар фош этилиб, ноқонуний ўзлаштирилган мулклар давлатга қайтарилди. Қумтор бўйича айниқса қимматли маълумотлар олинди. Бакиев қайтса, кўп сирлар ҳам очилади”, дейди у.

У қатор иқтисодий жиноятлар, хусусан, 7 апрелдан кейин йўқолган бойликлар бўйича муҳим маълумотларга ойдинлик киритилишини таклиф қилди.

“Балки шунинг учундир, 2010 йилдан бери муваққат ҳукумат Бакиевни қўлга олиш ва жиноий жавобгарликка тортишдан унчалик манфаатдор эмас. Балки барча жиноятларни, ҳатто ўзиникини ҳам қочоқ президентга юклаш қулай бўлгандир. Шунинг учун Бакиев келсин, ҳаммасини айтиб берсин, суд олдида, халқ олдида, қонун олдида жавоб берсин, агар эътироз бўлмаса, суд жараёни очиқ бўлсин”, дея хулоса қилди Чўлпонбек Абикеев.

Қочқин президент Қурманбек Бакиев Қирғизистон Олий суди томонидан 24 йиллик қамоқ жазосига ҳукм қилинган эди. У 2010 йилнинг 7 апрелида ҳокимиятдан ағдарилди. Мухолифат оилавий-клан бошқарувига қарши митинг ўтказди. Намойишчиларга қарши қурол ишлатилиб, 80 дан ортиқ одам ҳалок бўлди.

Қурманбек Бакиев, унинг ўғли Максим ва укаси Жаниш бир қатор айбловлар бўйича узоқ муддатга сиртдан ҳукм қилинган.

Қирғизистондан қочган Бакиевлар оиласи Минскда жойлашди. Максим Бакиев оиласи билан Буюк Британияда яшайди.

Эслатиб ўтамиз, аввалроқ Бишкек шаҳридаги КХШТ саммитида Беларусь фуқароси Александр Лукашенко журналистлар билан суҳбатда Қирғизистоннинг ҳокимиятдан ағдарилган раҳбари Қурманбек Бакиевнинг Минскдаги ҳаёти ҳақида гапирганди. Лукашенко Бакиевни расмий Бишкекка топширмаслигини, аммо вафот этган отасининг қабрини зиёрат қилиши учун Президент Садир Жапаров билан ҳал қилишини айтганди.