Қозоғистонлик вазир картошка нархининг ошишига Ўзбекистонни сабабчи қилди

Қозоғистоннинг Миллий иқтисодиёт вазири Серик Жумангарин мамлакатда картошка нархларининг ошишига изоҳ бериб, бунга сабаб сифатида Ўзбекистонда ҳосил бўлмаганини келтирди. Бу ҳақда у журналистларга берган интервьюсида сўз очган.

Маълум қилинишича, журналистларнинг картошка нархининг баландлиги ҳақидаги саволларига жавобан вазир ўтган йил картошкачилик ҳосилсиз келганини тасдиқлаган.

“Бу ерда талаб ва таклиф қонуни ишлайди. Картошка билан шунақа воқеалар юз берди – сабаби на Беларусда, на Россияда, на Ўзбекистонда ҳосил бўлмади. Қозоғистонда эса биз ўтган йили етарли захираларни шакллантирган эдик. Аммо фермерлар ҳам фойда кўриши керак эди, шунинг учун маълум бир вақтгача биз картошка экспортига тўсқинлик қилмадик. Картошка тақчиллиги йўқ, лекин нархлар ошди”, деган Серик Жумангарин.

Вазирнинг сўзларига кўра, ҳукуматда иккита йўл бор эди: биринчиси – картошка нархини чеклаш, бироқ бу ҳолда фермерлар бу йил уни умуман экмаслиги мумкин, бу эса келгуси йилда реал тақчилликка олиб келади. Иккинчи йўл – картошка экспортини чеклаш эди, ва айнан шу йўл танланган.

“Лекин биз нархларни чеклаш йўлига бормадик, чунки бу бозор механизмларига зид бўларди. Ҳозирда картошканинг нархи 400 дан 600 тенгегача. Ҳозир эса Туркистонда янги картошка чиқа бошлади, у 200–300 тенге атрофида. Менимча, яқин кунларда нархлар барқарорлашади. Ҳеч бир дақиқа бўлмади-ки, дўконлар пештахталарида картошка бўлмаган бўлса. Масала фақат нархда, лекин талаб ҳам шунга яраша бўлади”, деган Жумангарин.

Маълумот учун, бу йили Қозоғистонда 15 минг тонна “премиум” (юқори сифатли) картошка етиштирилган, оддий ижтимоий картошка эса 2,6 миллион тоннани ташкил қилган. “Иккинчи нон” ҳисобланган картошкага мамлакатда тақчиллик йўқ.

Эслатиб ўтамиз, аввалроқ беларуслик Александр Лукашенко мамлакатда картошка етиштириш ҳажмини ошириш зарурлигини таъкидлаб, бу картошка Беларуснинг ўзига ҳам, Россияга ҳам етиши кераклигини айтганди. Унга кўра, Россияда картошка етишмовчилиги кўпайиб бормоқда.