Қозоғистондаги АЭСда авария юзага келган тақдирда ким жавобгарликка тортилади?

Қозоғистон Республикаси Энергетика вазирлиги, консорциум шартларига кўра, мамлакатдаги атом электр станциясида авария юз берган тақдирда ким жавобгар бўлишини тушунтирди.

Мамлакат қонунчилигига кўра, ядровий иншоотнинг оператори ҳар қандай ядровий ҳодисалар учун асосий фуқаролик жавобгарлигини ўз зиммасига олади.

“Бу Қозоғистон ҳудудида оператор сифатида тайинланган компания ёки юридик шахс станцияни бошқариш, унинг хавфсизлигини таъминлаш ва авария оқибатларини бартараф этиш учун асосий жавобгарликни ўз зиммасига олишини англатади”, дея аниқлик киритди вазирлик.

Қозоғистон, шунингдек, Ядровий зарар учун фуқаролик жавобгарлиги тўғрисидаги конвенция ва Ядровий материалларни жисмоний ҳимоя қилиш тўғрисидаги конвенцияда иштирок этади. Ушбу халқаро шартномалар жавобгарлик ва етказилган зарарни қоплаш асосларини белгилайди ва бахтсиз ҳодисалар содир бўлган тақдирда операторларнинг жавобгарлигини белгилайди.

“Консорциум иштирокчилари, жумладан, технология ва ускуналарни етказиб берувчи халқаро компаниялар ҳам ўз маҳсулотлари сифати ва хавфсизлик стандартларига мувофиқлиги учун жавобгардир. Агар ҳодиса ускунадаги нуқсонлар ёки етказиб берувчилар томонидан бузилишлар натижасида юзага келса, улар шартномалар шартларига мувофиқ зарарни қоплашлари талаб қилиниши мумкин”, дея хулоса қилди Энергетика вазирлиги.

Қозоғистон Республикаси Бош вазирининг биринчи ўринбосари Роман Скляр Қозоғистонда атом электр станцияларини қуриш бўйича консорциум таркибига кўпи билан бешта давлат киришини маълум қилганди. Улар 2025 йилда сайланади.

Эслатиб ўтамиз, 6 октябрь куни Қозоғистонда атом электр станциясини қуриш бўйича республика референдуми бўлиб ўтганди. Овоз бериш натижаларига кўра, референдумда қатнашганларнинг 71,12 фоизи АЭС қурилишига рози бўлди. АҚШ Савдо палатаси катта вице-президенти Хуш Чокси Олмаотага ишчи ташрифи чоғида Қўшма Штатлар Қозоғистонда АЭС қурилиши бўйича ҳалол тендер ўтказилишига умид қилаётганини ва унда иштирок этишга тайёр эканини билдирди.