Қозоғистонда нефть қазиб олиш икки бараварга камайди – “Reuters”

Қозоғистон нефтининг асосий экспорт йўналиши бўлган Каспий қувур консорциуми (КҚК) Қора денгиз терминалининг дронлар ҳужумига учрагани ортидан мамлакатда нефть қазиб олиш кескин қисқарди. Бу ҳақда “Reuters” хабар берди.

Қайд этилишича, қазиб олиш энг кескин тушиб кетган жой мамлакатнинг энг йирик кони – Американинг Chevron компанияси бошчилигидаги консорциум томонидан ўзлаштирилаётган Тенгиз кони бўлган. Манбалардан бирининг сўзларига кўра, кеча, 22 июль куни у ерда қазиб олиш икки баравардан ҳам кўпроққа – июль ойидаги ўртача 925 минг баррелга нисбатан кунига тахминан 406 минг баррелгача камайган. Қозоғистонда умумий нефть ва газ конденсати қазиб олиш 22 июль куни июль ойидаги ўртача 2,07 млн баррелдан кунига 1,63 млн баррелгача тушган.

Қозоғистон Энергетика вазирлиги ҳам нефть қазиб олиш ҳажми қисқарганини тасдиқлаган. Вазирликнинг аниқлик киритишича, КҚК денгиз терминалида юк ортиш операциялари вақтинча тўхтатилган, шундан сўнг мамлакатда “кунлик қазиб олиш даражасини назорат қилинадиган тарзда тузатиш (камайтириш)” амалга оширилган. 

Қозоғистон нефть экспортининг 80 фоиздан ортиғи тўғри келадиган КҚК Россиянинг Қора денгиз соҳилидаги терминали яқинида танкерларга қилинган ҳужумлар сабабли юк ортишни вақтинча тўхтатди. Шу сабабли Қозоғистондан нефть қабул қилиш ҳам тўхтатилди. Россия консорциум танкерларига берилган зарбаларда Украинани айблаб, унинг “жаҳон нефть бозорларидаги вазиятни янада беқарорлаштиришга интилаётганини” билдирди. Охирги ойларда Россия энергетика инфратузилмасига зарбаларни кучайтирган Украина эса ҳужумларга изоҳ бермаган.

Эслатиб ўтамиз, жорий йилнинг 19 июль куни дронлар Новороссийск яқинидаги КҚК денгиз терминали ва иккита танкерга ҳужум қилди. Консорциум содир бўлган воқеани “террорчилик ҳужуми” деб атади ва бу унинг объектларига қилинган бешинчи ҳужум эканини маълум қилди. КҚК Қозоғистоннинг Тенгиз, Қашаған ва Қарачағанақ конларидан нефть ташийди. 2025 йилда терминал орқали тахминан 70,5 млн тонна нефть ўтказилган. КҚК қувури орқали дунё нефтининг деярли 2 фоизи экспорт қилинади.