Қозоғистонда “кўча”лар ўзбекистонликлардан ўлпон талаб қилди (видео)

Қозоғистоннинг Туркистон вилоятидаги “Қоплонбек” чегара ўтказиш пунктида номаълум шахс олти қиррали бурагич (“отвертка”) билан қўрқитиб, Ўзбекистондан ўтган шахслардан “улуш” талаб қилди. Вилоят Полиция департаменти мазкур ҳолат юзасидан изоҳ берди.

Бошқарма матбуот хизматига кўра, Туркистон вилояти Сариағаш туманидаги “Қоплонбек” ўтказиш пунктида содир этилган ноқонуний хатти-ҳаракатлар юзасидан жиноят иши қўзғатилган. Жиноят содир этганликда гумонланиб, муқим яшаш жойига эга бўлмаган 43 ёшли ишсиз Туркистон вилояти фуқароси қўлга олинган. Гумонланувчи Сариағаш тумани полиция бошқармасининг вақтинчалик сақлаш ҳибсхонасига жойлаштирилган. Ҳодисанинг қачон содир бўлгани очиқланмаган.

Билдирилишича, ҳозирда зарур тергов ҳаракатлари олиб борилмоқда. Полиция ҳар қандай ноқонуний хатти-ҳаракат Қозоғистон Республикаси қонунчилигига мувофиқ жавобгарликка сабаб бўлишини эслатиб ўтган.

“Чегараолди ҳудудларида жамоат тартиби ва фуқаролар хавфсизлигини, шу жумладан давлат чегарасини кесиб ўтаётган шахслар хавфсизлигини таъминлаш алоҳида назоратда”, дейилади хабарда.