Қора денгизда юк кемаси чўкиб кетди

Бортида Украинанинг 10 нафар денгизчиси бўлган юк кемаси Қора денгизда чўкиб кетди. Бу ҳақда “Maritime” хабар берди.

Маълумотларга кўра, жорий йилнинг 12 октябрь куни Қора денгизнинг Болгария қирғоқлари яқинида Камерун давлати байроғи остида сузиб бораётган “EILEEN” юк кемаси чўкишни бошлаган ва экипаж аъзолари қутқариб олинган.

Болгария Мудофаа вазирлиги маълумотларига кўра, кема ён томонидан тешилган ва шарқдан деярли 260 км узоқликда чўкишни бошлаган. Экипажнинг иккита аъзоси кемани тарк этиб, қутқарув сигналини юборган. Воқеа жойига Болгария ҳарбий-денгиз кучларининг чегара қўриқлаш кемаси ва вертолёти, шунингдек, Руминия ва Туркия кемалари жўнатилган. Биргаликда олиб борилган операция натижасида денгизчилар турк кемаси бортига жойлаштирилган.

“Қутқарув кемаси фалокат жойига этиб борди ва бутунлай чўкиб кетган кеманинг 10 нафар украиналик аъзолари қутқариб қолинди”, дая изоҳ берган Туркия қирғоқларини қўриқлаш хизмати.

Қайд этиш жоиз, “EILEEN” 1993 йилда қурилган ва ўзида 3000 тонна юкни сиғдира олади. Кема аввалроқ Грузия, Греция ва Туркия портларида текширувлар чоғида яроқсиз деб топилган.

Эслатиб ўтамиз, аввалроқ Хитойда энг янги атом сувости кемаси чўкиб кетган эди.

Бунёд Келдибоев