Қирғизистонлик депутат Ўзбекистон гуручининг дастидан ёзғирди

Қирғизистон парламенти – Жогорку Кенеш депутати Бурун Аманова мамлакатда гуруч қўшни Ўзбекистондан котрабанда йўли билан олиб келинаётгани сабаб фермерлар касодга учраётгани, рақобат қилолмаётганидан ёзғирди. У бу ҳақда парламент мажлисида сўз очди. 

Унинг сўзларига кўра, Оқ-Турпак тумани фермерлари унга мурожаат қилиб, мамлакатга Ўзбекистондан арзон нархларда контрабанда гуруч киритилаётганидан шикоят қилган.  

“Улар четдан келтирилган гуруч билан рақобатлаша олмаяпти ва шу сабабли зарар кўрмоқда. Уларнинг айтишича, олиб келинаётган гуруч Хитойдан ҳам бўлиши мумкин экан. Ҳукумат бу муаммони ҳал қилиш учун қандай чоралар кўрмоқда?” , дея Ҳукумат вакилига юзланган Бурун Аманова. 

Вазирлар Маҳкамаси раисининг ўринбосари – сув ресурслари, қишлоқ хўжалиги ва қайта ишлаш саноати вазири Бақит Тўробоев гуруч контрабандаси ҳақида биринчи марта эшитаётганини айтган.  

“Чегарачилар билан гаплашаман, шунингдек фитоназоратимиз бор, бу йўналишда чораларни кучайтирамиз. Бундан ташқари, яқинда менга Ўзбекистон вазири мурожаат қилиб, гуруч етишмовчилиги сабабли биздан 32 минг тонна гуруч сўраганини айтиб ўтмоқчиман. Мен уларга бундай миқдордаги гуручни таъминлай олмаслигимизни айтдим”, дея қўшимча қилган Бақит Тўробоев.

Маълумот учун, Қирғизистон Миллий статистика қўмитаси маълумотларига кўра, 2025 йилда мамлакатда гуруч етиштириш ҳажми сезиларли даражада ошган: қарийб 56 000 тонна (тозаланган вазнда). Бу 2024 йилга нисбатан (48 000 тонна) тахминан 17% га кўп демакдир.

Қирғизистон ўз гуручи (айниқса Ўзган гуручи) билан машҳур бўлса-да, аҳоли эҳтиёжини тўлиқ қоплаш учун ҳамон импортга таянади. 2025 йилнинг биринчи ярмида гуруч импорти 48% га ошган. Йиллик ҳисобда мамлакатга тахминан 12 000 – 15 000 тонна гуруч олиб кирилган (асосан Қозоғистон, Россия, Покистон ва Ҳиндистондан).

Қирғизистон ҳам экспортни оширмоқда. Айниқса, Ўзбекистонга гуруч экспорти 2025 йилда қарийб 3,7 бараварга кўпайган.