Қирғизистонда собиқ вазир ва унинг ўғли қамалди

Жорий йилнинг 5 февраль куни Қирғизистонда Бишкекнинг Первомайский туман суди мамлакатнинг собиқ табиий ресурслар, экология ва техник назорат вазири Динара Қутманова ва унинг ўғли Камол Қутмановга нисбатан қарор чиқарди. Бу ҳақда АКИпресс хабар берди.

6 февраль куни туман суди матбуот хизматининг хабар беришича, Динара Қутманова Қирғизистон Жиноят кодексининг 337-моддаси 4-қисми (мансабдор шахс томонидан мансаб ваколатини суиистеъмол қилиш) билан айбдор деб топилиб, мол-мулки мусодара қилиниб, 3 йил муддатга давлат лавозимини эгаллаш ҳуқуқидан маҳрум қилинган ҳолда 8 йилга қамалди.

Унинг ўғли Камол Қутманов эса Қирғизистон Жиноят кодексининг 209-моддаси 4-қисми 1-банди (ўта йирик миқдордаги фирибгарлик) билан айбдор деб топилиб, 8 йил муддатга озодликдан маҳрум қилиш билан бирга мол-мулки мусодара қилиниб, 3 йил муддатга якка тартибдаги тадбиркорлик фаолияти билан шуғулланиш ҳуқуқидан маҳрум этилди.

Миллий хавфсизлик давлат қўмитаси маълумотларига кўра, Қутманова Табиий ресурслар вазирлигига раҳбарлик қилган вақтида давлат томонидан ажратилган маблағларни ноқонуний олиб чиқиб кетиш бўйича кенг кўламли коррупция тармоғини ташкил этган. Махсус хизматлар таъкидлаганидек, у жиноятга нафақат ўзининг қўл остидаги ходимларини, балки “атроф-муҳитни муҳофаза қилиш ва экология соҳасидаги уйдирма лойиҳаларни молиялаштириш учун ариза топширишни тақлид қилиш” учун қариндошларини (ўғли Камол Қутманов ва синглиси), шу жумладан, атрофидаги бошқа шахсларни (уй бекаси, ўғлининг дўсти ва бошқалар) ҳам жалб қилган.

Қутманова 2023 йилнинг 25 июлида қўлга олинган, унинг ўғли Камол Қутманов эса қидирувга берилган эди. У 2023 йил 17 октябрда ҳибсга олинган.

Маълумот учун, Динара Қутманова 2020 йилнинг ноябридан 2021 йилнинг майигача Атроф-муҳитни муҳофаза қилиш ва ўрмон хўжалиги давлат агентлиги директори лавозимида ишлаган. 2021 йилнинг май ойидан октябригача Экология ва иқлим давлат қўмитасига раҳбарлик қилган. 2021 йил октябрдан 2023 йил мартигача табиий ресурслар, экология ва техника назорати вазири лавозимида ишлаган. Уч йил давомида жами молиялаштириш ҳажми қарийб 969 миллион 568 минг сомни ташкил этиб, шундан 180 миллион соми Табиий ресурслар вазирлиги эҳтиёжлари учун давлат харидларига, 789 миллион 568 минг соми жисмоний ва юридик шахсларга табиатни муҳофаза қилиш ва муҳофаза қилиш бўйича 110 та лойиҳа доирасида ажратилган. Бундан ташқари, Миллий хавфсизлик давлат қўмитасига Қутманова томонидан молиялаштириш лойиҳаларини танлаш комиссияси аъзолари иштирокисиз комиссия йиғилишини расман ўтказиш мақсадида уларга нисбатан босим ўтказилгани факти тасдиқланган.

Эслатиб ўтамиз, ўтган йилнинг август ойида Ўзбекистонда 2017 йилдан 2021 йилгача Уй-жой коммунал хўжалиги вазири, 2021 йилдан 2023 йилгача Нурафшон шаҳар ҳокими лавозимида ишлаган собиқ мансабдор 7 йилга қамалганди. Жазони умумий тартибли колонияларда ўтаттириш белгиланган.