Қирғизистон Ўзбекистон сабаб қорамол экспортини тақиқлаб қўйди

Жорий йилнинг 31 январидан бошлаб Қирғизистон Сув, қишлоқ хўжалиги ва қайта ишлаш саноати вазирлиги ҳузуридаги Ветеринария хизмати томонидан қишлоқ хўжалиги ҳайвонлари, жумладан, қорамол, майда қорамол ва отларни олиб чиқиш учун рухсатномалар бериш тўхтатилди. Бу ҳақда бошқарма матбуот хизмати хабар берди. 

Чекловлар вазирликнинг “Қишлоқ хўжалиги товарлари рўйхатини тасдиқлаш тўғрисида”ги 04-13/4-сонли буйруғига асосан киритилган. Илгари берилган рухсатномалар текширувлар якунлангунга қадар ва меъёрий-ҳуқуқий база тўғрилангунига қадар вақтинчалик тўхтатиб турилди.  

“Рухсат бериш жараёнининг қайта тикланиши кейинроқ эълон қилинади”, дейилади хабарда. 

Маълум қилинишича, жорий йилнинг 29 январь куни Қирғизистон парламенти депутати Жанар Акаев Ўзбекистонга ҳар ҳафта 15-20 минг бош қорамол олиб чиқилаётгани, ветеринария хизмати ходимлари гўёки бўлим бошлиғи учун ҳар бир ҳайвондан 100 сомдан пул йиғишаётгани ҳақида сўз очган. Шундан сўнг у Миллий хавфсизлик давлат қўмитасига мурожаат қилиб, вазиятни ўрганишни сўраган. 

Кейинчалик ветеринария хизмати депутатнинг баёнотини асоссиз ва ҳақиқатга тўғри келмайдиган деб атади. Хизмат, шунингдек, депутатнинг баёноти асосида ички текширув бошлангани ҳақида хабар берди. 

Чорвачилик экспортига вақтинчалик тақиқ бу айбловлар натижасими ёки йўқми, ҳозирча маълум эмас. 

Эслатиб ўтамиз, 2024 йил сентябрь ойида Сув, қишлоқ хўжалиги ва қайта ишлаш саноати вазирлиги қорамол, майда қорамол ва отларни олиб чиқиш учун рухсатномалар беришни тўхтатиб қўйган эди. Бунга сабаб Ҳайвонларни идентификация қилиш ва кузатиш тизимида қишлоқ хўжалиги ҳайвонларини идентификация қилиш бўйича инвентаризация ўтказиш эди.