Қирғизистон Ўзбекистон билан чегарадаги ўтказиш пунктларини очди

Қирғизистон коронавирус пандемияси сабаб ёпилган Ўзбекистон билан чегарадаги ўтказиш пунктлар ишини қайта тиклади. Бу ҳақда Қирғизистон давлат чегара хизмати хабар берди.

Кеча, 2 сентябрдан бошлаб икки давлат фуқаролари чегарани “Дўстлик-автойўл”, “Қизил-Қия-автойўл”, “Маданият-автойўл” ва “Баймак-автойўл” ўтказиш пунктлари орқали ўтишлари мумкин.

Шу кундан бошлаб Қирғизистон ва Ўзбекистон ўртасидаги ўтказиш пунктлари орқали транспорт ва фуқаролар кириш-чиқиши учун қўйилган чекловлар олиб ташланган. Республика ҳудудига чекловсиз кириш мумкин, аммо санитария-эпидемиологик талабларга қатъий риоя қилиш талаб этилади.

Транспорт воситалари чегарадан “Дўстлик-автойўл”, “Қизил-Қия-автойўл”, ва “Қадамжой-автойўл” назорат ўтказиш пунктлари орқали ўтишлари мумкинлиги айтилган.

Aввалроқ, 1 сентябрдан бошлаб Ўзбекистон фуқаролари Қирғизистонга ҳудудига турли чекловларсиз кириши мумкинлиги ҳақида хабар берган эдик.

Aҳрорбек Ҳайруллаев