Қирғизистон мактабларида ҳам телефондан фойдаланиш тақиқланиши мумкин

Қирғизистон Таълим ва фан вазирлиги мактаб ва олий ўқув юртларида телефондан фойдаланишни тақиқлашни таклиф қилмоқда. Бу ҳақда “24.kg” хабар берди.

“Таълим ташкилотларида мобил қурилмалардан фойдаланиш тартибини тасдиқлаш тўғрисида”ги қарор лойиҳаси жамоатчилик муҳокамасига қўйилган. Ҳужжатда мактаб ва олий ўқув юртларининг талабалари ва ходимлари таълим муассасаси биносига киришда ўз гаджетларини сукут режимга ўтказиши талаб қилиниши белгиланди. Талабалар мобил қурилмаларини ўчириб, синфларда белгиланган жойларда қолдириши керак бўлади. Телефондан фақат танаффус пайтида ёки фавқулодда ҳолатларда фойдаланиш мумкин. Телефонларни қувватлантириш ҳам тақиқланади.

Таълим вазирлиги, шунингдек, қуйидаги мақсадларда телефондан фойдаланишни тақиқлашни таклиф қилмоқда:

• зўравонлик, шафқатсизлик ёки порнографияни тарғиб қилувчи материалларни тарқатиш;
• таълим муассасаси обрўсига путур етказадиган ҳаракатлар;
• фото ва видео суратга олиш.

Шунингдек, ўқитувчиларга ҳам дарс вақтида телефондан фойдаланиш тақиқланади, агар бу таълим жараёни билан боғлиқ бўлмаса.

Қайд этилишича, ишлаб чиқилган қоидалар ўқувчилар саломатлигини муҳофаза қилиш, ижтимоий-маърифий муҳитни яхшилаш, шунингдек, безорилик ва номақбул контент тарқалишининг олдини олишга қаратилган.

Эслатиб ўтамиз, 2023 йилда Россия Президенти Владимир Путин мактаб ўқувчиларининг дарсда мобиль телефондан фойдаланишини тақиқловчи қонунни имзолаганди. Ушбу қоидага истиснолар сифатида мактаб ўқувчилари ва ўқитувчиларининг ҳаёти ёки соғлиғига таҳдид соладиган ҳолатлар ва бошқа фавқулодда вазиятлар киритилган. Шунингдек, яқинда Қозоғистон Президенти Қосим-Жомарт Тўқаев ҳам “Айрим қонун ҳужжатларига таълим, тарбия ва болалар хавфсизлиги масалалари бўйича ўзгартириш ва қўшимчалар киритиш тўғрисида”ги қонунни имзолаганди. Бу билан ўқувчиларга дарс вақтида телефондан фойдаланиш тақиқланди.