Кэмерон Маҳмуд Аббосга Ғазо бўйича режасини айтди
Олам
−
25 Январь
5513Буюк Британия Ташқи ишлар вазири Дэвид Кэмерон Фаластин Президенти Маҳмуд Аббос билан блокададаги Ғазо секторидаги вазиятни муҳокама қилди. Бу ҳақда Британия дипломатияси раҳбари Х ижтимоий тармоғида маълум қилди.
“Президент Аббос билан Ғарбий Соҳил ва Ғазо секторидаги вазиятни муҳокама қилиш учун учрашдим. Бизнинг паузадан – ёрдам етказиб бериш ва маҳбусларни олиб чиқишдан – узоқ муддатли сиёсий ечимга, жумладан, Фаластин давлатини яратишга олиб келадиган барқарор ўт очишни тўхтатишга ўтиш режамизни баён қилдик”, деб ёзди вазир.
Бир кун аввал Кэмерон Исроилга учта асосий масалани муҳокама қилиш учун келгани ҳақида ёзганди.
Вазирнинг аниқлик киритишича, йиғилиш кун тартибига маҳбусларни зудлик билан озод қилишга кўмаклашиш, кўпроқ назорат пунктлари орқали Ғазога инсонпарварлик ёрдамини кўпайтириш, вақтинчалик гуманитар пауза, кейин эса барқарор ўт очишни тўхтатишга ўтиш киради.
Кэмерон, шунингдек, Исроил Бош вазири Биньямин Нетаньяху ва исроиллик мавқедоши Исраэль Кац билан тушган суратларини ҳам жойлаштирган.
Эслатиб ўтамиз, Буюк Британия Бош вазири Риши Сунак 23 январь куни мамлакат парламентининг Жамоатлар палатасида қилган чиқишида ҲАМАС Фаластин анклавида тинчликни таъминлаш учун гаровга олинган барча исроилликларни озод қилиши ва Ғазо сектори устидан назоратдан воз кечиши кераклигини айтганди. У Британия ҳукумати доимий равишда Яқин Шарқ можаросини икки давлатнинг ёнма-ён яшаши тамойили асосида ҳал этиш тарафдори эканини таъкидлади.
LiveБарчаси