Қатардаги Жаҳон чемпионати Месси учун охиргисими?

Аргентина терма жамоаси ва Франциянинг ПСЖ клуби футболчиси Лионель Месси Қатар яшил майдонларида бўлиб ўтадиган Жаҳон чемпионати фаолиятидаги энг охиргиси бўлишини маълум қилди. Бу ҳақда Мессининг сўзларига таяниб, “Star+” нашри хабар берди.

Шунингдек, Месси Аргентина тарихдан Жаҳон чемпионатини ютишга даъвогарлигини, аммо ҳозир улар яққол фаворитлар қаторида эмаслигини айтган.

“2022 йилги Жаҳон чемпионати мен учун охиргиси бўладими? Ҳа, албатта. Менинг жисмоний ҳолатим яхши, бу йил мавсумолди йиғинлари ажойиб ўтди. Бундан бир йил олдин бундай бўлмаганди. Ўтган йили машғулотларни кеч бошладим ва ўйин ритми йўқ эди. Мавсум эса аллақачон бошланган эди. Кейин терма жамоадан жароҳат олиб қайтдим ва бошлаган ишимни охирига етказа олмадим. Ҳозир мен Жаҳон чемпионати бошланишига кунларни санаб, унинг старт олишини интизорлик билан кутяпман. Мен ҳаммаси қандай кетаётганини ва қандай тугашини кўрмоқчиман. Бир томондан, биз мундиални кутмоқдамиз, иккинчи томондан, иштирокимиз муваффақиятли чиқишини хоҳлаймиз.

Барча ўйинлар қийин бўлади, шунинг учун Жаҳон чемпионати ўзгача мусобақа саналади. Чунки у ерда фаворитлар ҳар доим ҳам ғалаба қозона олмайди ва ҳаммасини олдиндан айтиб бўлмайди. Бизни асосий даъвогар деб ҳисоблаш мумкинми? Билмайман. Ҳа, Аргентина тарихан ғалабага даъвогар бўлган, аммо ҳозир биз фаворит эмасмиз, имкониятлари юқорироқ бошқа жамоалар бор”, деган Месси.

Қайд этиш керакки, навбатдаги Жаҳон чемпионати 2026 йили АҚШ, Канада ва Мексикада ташкил этилади. Ўшанда Лео Месси 39 ёшни қаршилаган бўлади.

Маълумот учун, жорий мавсум Лионель Месси ПСЖ сафида 13 та учрашувда майдонга тушиб, 8 та гол урди ва 8 та голли узатма амалга оширди.