Июль ойида ўзбекистонликларни қандай об-ҳаво кутаётгани маълум қилинди

Ўзбекистонда июль ойи жуда иссиқ бўлмаслиги кутилмоқда. Бу бўйича Республика Гидрометеорология хизмати Жаҳон прогностик марказларининг ҳисоб-китобларига асосаланган ҳолда хабар қилди.

Келтирилишича, республиканинг катта қисмида ўртача ойлик ҳарорат одатий кўп йиллик ҳаво ҳароратига яқин бўлиши кутилмоқда. Фақат шимолда, жанубда ва чўл ҳудудларнинг баъзи жойларида меъёрдан 1-1,5 даражага юқори ҳарорат бўлади.

Ўзбекистон ҳудудида Эрон ҳудудларидан яна иссиқ ҳаво кириб келиши ҳисобига июль ойи иссиқ об-ҳаво билан бошланади. 1-3 июль кунлари ҳаво ҳарорати 37-40 даражага, чўл ҳудудларда ва республиканинг жанубида 41-43 даража иссиқга кўтарилади.

Июль ойи биринчи ўн кунлигининг ўрталарига келиб, ҳарорат 3-5 даражага пасайиши кутилмоқда.

Кейинчалик, ойнинг охиригача ҳаво ҳарорати кечалари 20-25 даража атрофида, баъзи жойларда 27 даражагача, кундуз кунлари 33-38 даражагача, айрим кунларда 39-41 даражагача, жанубда ва чўл ҳудудларда 42-45 даража иссиқгача бўлади.

Республика бўйича баъзи жойларда, асосан тоғ олди ва тоғли ҳудудларда қисқа муддатли ёмғир ёғиши ва момақалдироқ бўлиши мумкин.