Италияда француз ҳайдовчининг фургонидан жанговар ракеталар топилди

Италияда 46 ёшли француз ҳайдовчи ҳарбий қурол-яроғларни ноқонуний ташишда гумонланиб, ҳибсга олинди. Унинг фургонидан танкка қарши қурол тизимларига мўлжалланган бешта контейнер ва учта Akeron ракетаси топилган. Бу ҳақда “Euronews” хабар берди.

Қайд этилишича, ҳодиса Бари портида юз берган. Франция давлат рақамларига эга фургон Superfast II кемаси Патрасдан келиб, портга кирганидан сўнг текширилган. Ҳайдовчи Регис Cлауде Алберт Норманд деб таништирилган. Текширув вақтида у учта халқаро юк ҳужжатини тақдим этган, бироқ ҳужжатларда юкнинг аниқ мазмуни кўрсатилмаган.

Кейинги текширувлар давомида фургондан бешта контейнер топилган. Улардан бири бўш бўлган. Иккинчисидан бошқарув тизими, двигатели ёки жанговор каллаги бўлмаган, машғулотлар учун мўлжалланган инерт ракета аниқланган. Қолган учта контейнернинг ҳар биридан биттадан Akeron ракетаси топилган.

Ракеталар ҳарбий қурол ҳисобланадими ёки йўқми, деган масалага аниқлик киритиш учун Италия армияси мутахассислари жалб этилган. Тергов давомида контейнерлардаги қувурларнинг ранги ҳам эътиборга олинган. Уларда НАТО стандартларига кўра, портловчи моддалар мавжуд бўлмаган ўқув жиҳозларини билдирувчи кўк рангли белгилар бўлган.

Бироқ ҳарбий мутахассислар ушбу белгилар асл ишлаб чиқарувчи тамғалари эмаслиги, оддий ёпиштирувчи лента ёрдамида қўйилган бўлиши мумкинлигини билдирган. Лента олиб ташланганидан сўнг қувурларда юқори портловчи ўқ-дориларни билдирувчи сариқ-қора ранглар кўрингани айтилмоқда.

Ҳайдовчи терговчиларга қурол-яроғларни мудофаа компанияси MBDA топшириғи билан Грецияга олиб кетаётганини билдирган. Унинг сўзларига кўра, юк Altus LSA компаниясига таъмирлаш учун етказилиши керак бўлган.

Норманднинг ҳимоячилари судга тижорий ва сафар ҳужжатлари, шунингдек, Франция Мудофаа вазирлигининг 2025 йилда MBDA France компаниясига ҳарбий техника билан боғлиқ фаолият учун берган рухсатномасини тақдим этган.

Шунга қарамай, Бари суди судьяси Валерия Изабелла Валенци иш бўйича қўшимча тергов ўтказиш зарур, деган хулосага келган. Судья тақдим этилган ҳужжатларда турли муҳрлар ва саналардаги тафовутлар мавжудлигини қайд этган.

Бундан ташқари, Италия қонунчилигига кўра ҳарбий техникаларни ташиш учун талаб этиладиган рухсатномалар портдаги текширув вақтида ҳам, кейинчалик суд органларига ҳам тақдим этилмаган.

Норманд ўзини ҳарбий юкларни ташишга ихтисослашган француз компаниясининг субпудратчиси сифатида ишлашини билдирган. Бироқ терговчиларга кўра, у фаолият юритадиган ва рафиқаси номига рўйхатдан ўтган транспорт компанияси бундай турдаги юкларни ташишга ихтисослашгани исботланмаган. Ҳозир терговчилар ракеталар қаердан келгани, қаерга олиб кетилаётгани ва уларни ташиш учун тегишли рухсат мавжуд бўлган-бўлмаганини аниқламоқда.

Бари суди ҳайдовчини тергов давомида қамоқда сақлаш тўғрисида қарор чиқарган.