Туркия Европада бир вақтнинг ўзида 3 та самолётни қўндира ва учира оладиган биринчи мамлакат бўлди (видео)

north_east

Энг яхши аэропортлар рейтинги эълон қилинди. Ўзбекистон борми?

Кеча, 17 апрель кунидан эътиборан Туркиянинг Истанбул аэропортида бир вақтнинг ўзида учта мустақил учиш-қўниш йўлаги ишга тушди. Бу ҳақда TRT хабар берди.

Янги тизим билан Истанбул аэропортига 3 та самолёт бир вақтнинг ўзида қўниш ва учиш имкониятига эга бўлади. Нашрга кўра, Европада бу лойиҳани амалга ошира оладиган ягона давлат Туркия ҳисобланади.

Мамлакатнинг Транспорт ва инфратузилма вазири Абдулқодир Уралўғли Истанбул аэропортида ҳаво ҳаракатини бошқаришда тарихий қадам ташланганини айтган. У, шунингдек, Истанбул аэропорти транспорт оқимининг уч карра мустақил учиш-қўниш йўлаги билан ишлаши ҳаво бандаргоҳи фаолиятининг тезлашишини ва динамик сиғими ортишини тилга олган.

“АҚШда уч томонлама мустақил учиш-қўниш йўлаги операцияси татбиқ қилинмоқда. Истанбул аэропорти Европада учлик учиш-қўниш йўлаги фаолиятини бошлаган биринчи аэропорт бўлди”, деган у.

Аэропортнинг ушбу янгилиги учун дастлабки ҳаракатлар 2022 йилнинг сўнгги чорагида бошланган ва 2023-2024 йилларда Европа ҳаво навигацияси хавфсизлиги ташкилоти, Давлат аэропортлари маъмурияти ва Туркия фуқаролик авиацияси бош бошқармаси билан ҳамкорликда йиғилишлар, хавф таҳлиллари, хавфсизлик тадқиқотлари ва симуляциялар амалга оширилган. 

Эслатиб ўтамиз, аввалроқ Буюк Британиянинг дунё авиакомпаниялари ва аэропортларини баҳолаш билан шуғулланувчи Skytrax компанияси эълон қилган 2025 йилдаги дунёнинг энг яхши аэропортлари рейтингида Истанбул аэропорти оилавий саёҳатлар учун энг қулай аэропорт сифатида 14-ўринни эгаллаганди.