Исроилга қарши санкцияларнинг йўқлиги геноцидни қўллаб-қувватлашдир – БМТ вакили

БМТнинг босиб олинган Фаластин ҳудудларидаги инсон ҳуқуқлари бўйича махсус маърузачиси Франческа Альбанезе Исроилнинг Ғазо секторини электр таъминотидан узишига қарши санкциялар йўқлиги ва бу давлатга қурол етказиб беришнинг давом этишини фаластинликлар геноцидига шериклик деб атади. Бу ҳақда у ўзининг Х ижтимоий тармоғидаги саҳифасида ёзди.

“Ғазо секторига электр энергиясини узиб қўйиш туздан тозалаш иншоотларининг ишламай қолишига, яъни тоза сув етказиб беришнинг тўхташига ҳам олиб келади. Исроилга қарши санкцияларнинг йўқлиги ва бу давлатга қурол етказиб беришга эмбарго қўлланмаслиги геноцидни қўллаб-қувватлашдир”, дейди у.

Жорий йилнинг 9 март куни Исроилнинг “Kan” давлат телерадиокомпанияси мамлакат энергетика вазири Эли Коэн Ғазо секторига электр энергияси етказиб беришни тўхтатиш бўйича кўрсатма берганини хабар қилди. Кан хабарига кўра, Исроил Ғазода жойлашган сувни тозалаш иншоотининг ишлаши учун электр энергияси етказиб берган, бироқ Ғазодаги асосий электр энергияси генераторлар ёрдамида ишлаб чиқарилади ва ушбу генераторлар учун ёқилғи аллақачон бир ҳафтадан буён етказиб берилмаяпти.

Бундан бир ҳафта олдин, 2 март куни Исроил Ғазога инсонпарварлик ёрдами етказиб беришни тўхтатган ва барча назорат-ўтказиш пунктларини ёпган эди. Бу қарор ҲАМАС томонидан АҚШ Президенти махсус вакили Стивен Уиткофф томонидан таклиф қилинган ўт очишни тўхтатиш режаси бўйича музокараларни давом эттиришга рози бўлмаганидан кейин қабул қилинган.

Эслатиб ўтамиз, бугун, 10 март куни Исроил ҳукумати Қатарга делегация юбориб, ҲАМАС ҳаракати билан ўт очишни тўхтатиш ва гаровга олинганларни озод қилиш бўйича музокараларни иккинчи босқичига ўтказишни режа қилинганди.