Исроил ҲАМАСнинг сулҳ таклифига рози бўлмади

Исроил ҲАМАСнинг Ғазо секторида жангларни тўхтатиш эвазига гаровга олинганларни қайтариш ҳақидаги таклифига рози бўлмади. Бу ҳақда Бош вазир Биньямин Нетаньяху маълум қилди.

"ҲАМАС гаровга олинганларни озод қилиш эвазига урушни тўхтатишни, Ғазо секторидан қўшинларимизни олиб чиқишни, қотиллар ва зўравонларни “Нухба” гуруҳи махсус кучларидан озод қилишни ва ҲАМАСни жойида қолдиришни талаб қилмоқда. Мен Исроил хавфсизлиги учун бундай ҳалокатли зарбани қабул қилишга тайёр эмасман", дейди Исроил Бош вазири. 

Нетаньяхунинг қайд этишича, ҲАМАСнинг шартларини қабул қилиш исроиллик ҳарбийлар орасидаги қурбонлар қийматини пасайтиради. Шу билан бирга, Бош вазир гаровга олинганларни озод қилиш уруш мақсадларидан бири эканини ва бунга эришиш учун у "тун-у кун" ишлаётганини таъкидлади.

Олдинроқ Нетаньяху урушни тугатиш шарти – ҲАМАСни йўқ қилиш, Ғазо секторининг Миср билан чегарасини назоратга олиш, минтақани демилитаризация қилиш ва Фаластин жамиятини "дерадикализация қилиш" эканлигини айтган. Бош вазирнинг тахминларига кўра, ҲАМАС билан уруш 2025 йилгача давом этади.

NBC News телеканали ҳам номи ошкор этилмаган дипломатга таяниб, ҲАМАС томонидан гаровда ушлаб турилганларни озод қилиш бўйича музокаралар тўхтаб қолганини хабар қилган. 

Таъкидланишича, томонлар гаровга олинганларни фаластинлик маҳбуслар билан алмашишнинг "баъзи механизмлари" бўйича келишиб олган, бироқ Исроилнинг позицияси келишувга эришишга имкон бермаган.

Шартномада маҳбусларни босқичма-босқич озод қилиш билан бир ойдан ортиқ вақт давомида жанговар ҳаракатларни тўхтатиш кўзда тутилган.

"Тафсилотларнинг аксарияти келишиб олинди. Тўсиқ – исроилликлар доимий ўт очишни тўхтатишга рози бўлишни истамаяпти", дейди дипломат.

Эслатиб ўтамиз, олдинроқ Исроил ва ҲАМАС Ғазо секторидаги исроиллик гаровга олинганларга зарур дори-дармонларни етказишга келишиб олганди. Бу келишувга Қатар ва Франция иштирокида эришилди.