Испаниялик миллиардернинг ўғли отасини ўлдирганликда гумонланмоқда

Каталония полицияси Mango кийим-кечак дўконлари тармоғи асосчиси Исак Андикни ўлдирганликда гумон қилиб, унинг ўғли Жонатан Андикни ҳибсга олди. Бу ҳақда “El Pais” хабар берди.

71 ёшли тадбиркор 2024 йил декабрь ойида жарликдан қулаб ҳалок бўлган. Дастлаб унинг ўлими бахтсиз ҳодиса сифатида кўриб чиқилган ва тадбиркорнинг ўғли ҳам айнан шу версияни ёқлаб турибди. Бироқ Испаниянинг TVE агентлиги ўз манбасига таяниб хабар беришича, Жонатан Андик тергов ҳибсхонасига жойлаштирилган. Яқин соатлар ичида у суд олдида жавоб бериши керак. Андиклар оиласи вакилининг баёнот беришича, ҳибсга олинган шахс отасининг ўлими бўйича олиб борилаётган терговда расмий идоралар билан ҳамкорлик қилади. Ишнинг бошқа тафсилотлари ҳозирча маълум эмас.

Маълумот учун, Исак Андик 2024 йил 14 декабрда Барселона провинциясидаги жарликдан қулаши оқибатида ҳалок бўлган. Ўша куни у ўғли билан сайр қилаётган бўлган ва ўғли фожианинг ягона гувоҳига айланган. Орадан бир неча ҳафта ўтиб, бизнесменнинг ўлимига доир иш ёпилган, бироқ 2025 йилнинг март ойида Марторель шаҳри суди терговни қайта тиклаган. Марҳум ворисининг бир-бирига зид кўрсатмалари полицияда шубҳа уйғотган.

Шунингдек, тоққа чиқишдан олдин у отасининг тан соқчисидан “уларни ёлғиз қолдиришни” сўрагани маълум бўлган. Бундан ташқари, Жонатан Андикнинг севгилиси – гольфчи Эстефания Кнут уларнинг отаси билан муносабатлари “вақти-вақти билан кескин” бўлиб турганини баёнот қилган.

Исак Андик Mango компаниясига 1984 йилда акаси Нахман билан биргаликда асос солган. 2023 йилги маълумотларга кўра, компаниянинг даромади 3,1 миллиард еврони ташкил этган. Андикнинг бойлиги 4,5 миллиард долларга баҳоланиб, у Испаниянинг энг бой 5 нафар кишиси рўйхатига кирар эди.