Испанияда 3 кунлик мотам эълон қилинди

Испанияда икки юқори тезликда ҳаракатланувчи поезд тўқнашуви оқибатида камида 68 киши ҳалок бўлди, яна 107 киши тиббий ёрдам олди. Мамлакат Бош вазири Педро Санчес бугун, 29 октябрдан бошлаб уч кунлик миллий мотам эълон қилди. Бу ҳақда “The Guardian” нашри хабар берди.

Ҳодиса кеча, 28 октябрь куни Испаниянинг марказий қисмидаги Толедо вилоятининг Урда шаҳри яқинида содир бўлган. Мадриддан Севильяга ҳаракатланаётган Renfe компаниясининг юқори тезликдаги поезди темирйўлда тўхтаб турган Iryo компанияси поездига орқадан урилган. Зарба оқибатида бир нечта вагон релсдан чиқиб кетган.

Маълум қилинишича, поездларда жами 544 киши бўлган. Жароҳатланганлардан 15 нафари оғир аҳволда. Қутқарувчилар вайрон бўлган вагонлар орасида қидирув ишларини давом эттирган. Маҳаллий ҳокимият вакиллари қурбонлар сони яна ортиши мумкинлигини истисно қилмаган.

Испания Транспорт вазири Оскар Пуэнтенинг дастлабки маълумотларга кўра, ҳалокатга темирйўл ҳаракатини бошқариш тизимидаги техник носозлик ва ундан кейин қабул қилинган нотўғри қарор сабаб бўлган бўлиши мумкинлигини айтган.

Вазирнинг билдиришича, поездлар ҳаракатини назорат қилувчи LZB сигнализация тизими маҳаллий вақт билан соат 08:30 атрофида компьютердаги носозлик туфайли ишдан чиққан. Натижада темирйўлнинг қарийб 63 километрлик қисмида олтита поезд тўхтаб қолган.

Шундан сўнг, Мадриддаги ҳаракатни бошқариш маркази камида иккита поездга ҳаракатни давом эттиришни буюрган. Бироқ темирйўлда тўхташ сигнали сақланиб қолган. Вазирнинг айтишича, Renfe поезди қарийб 25 километр йўл босиб, тахминан 17 дақиқадан кейин тўхтаб турган Iryo поездига бориб урилган.

“Ҳаракатни қайта бошлаш тўғрисидаги қарорни назорат маркази операторлари қабул қилган. Бизнинг нуқтаи назаримиздан, бундай қарор қандай шароитда қабул қилинганини тушуниш қийин. Аниқки, бу нотўғри қарор бўлган”, деган Оскар Пуэнте.

У ҳодисанинг аниқ сабаблари тергов давомида ўрганилишини билдирган. Ҳозирча поезднинг тўқнашув олдидан қандай тезликда ҳаракатлангани маълум эмас.

Испания Бош вазири Педро Санчес ҳалокат жойига ташриф буюриб, темирйўл хавфсизлигини кучайтиришга ваъда берган. Унинг таъкидлашича, мамлакатда бир йил ичида иккита йирик поезд ҳалокати содир бўлиши қабул қилиб бўлмайдиган ҳолатдир.

“Юқори тезликда ҳаракатланувчи поездлар хизматининг хавфсизлигини кучайтиришимиз ва тизимга бўлган ишончни тиклашимиз кераклиги аниқ”, деган Санчес.

Маълумот учун, жорийнинг йил январь ойида Испания жанубидаги Адамус шаҳри яқинида икки поезд тўқнашуви оқибатида 46 киши ҳалок бўлган, ўнлаб одамлар жароҳатланган эди. Ҳар икки ҳалокатда ҳам давлатга қарашли Renfe ва хусусий Iryo компанияларининг поездлари иштирок этган.

Бу сафарги ҳалокат мамлакатда навбатдаги парламент сайловларига бир неча ҳафта қолганида содир бўлди. Мухолиф Халқ партияси етакчиси Альберто Нуньес Фейхоо ҳодисани зудлик билан текширишга, шунингдек, Испаниянинг бутун темирйўл тармоғи хавфсизлигини мустақил ўрганишга чақирди.

Ҳалокатдан сўнг мамлакат бўйлаб қурбонлар хотирасига бир дақиқалик сукут сақланди. Испания футбол федерацияси чоршанба куни ўтказилиши режалаштирилган Испания кубогининг 24 та учрашувини ҳам қолдирди.

Эслатиб ўтамиз, аввалроқ Испаниянинг Толедо провинциясида юз берган поездлар тўқнашувида мамлакатнинг собиқ меҳнат вазири Фотима Баньес ҳалок бўлгани ҳақида хабар берилган эди.