Испанияда тезюрар поездлар тўқнашиб кетди. Кўплаб қурбонлар бор (видео)

Кеча, 18 январь куни Испаниянинг жанубида тезюрар поездлардан бири рельсдан чиқиб, қарама-қарши йўналишда келаётган бошқа бир поезд билан тўқнашиб кетди. Зарба оқибатида иккинчи поезд ҳам рельсдан чиқиб, темирйўлдан пастга қулаб тушган. Полиция манбалари камида 21 киши ҳалок бўлганини тасдиқлаган. Бу ҳақда “Reuters” хабар берди.

Қайд этилишича, ҳалокат Кордоба вилоятидаги Адамус шаҳри яқинида, Мадриддан тахминан 360 километр жанубда содир бўлган. Андалусия минтақавий ҳукумати раҳбари Хуанма Моренонинг айтишича, 75 киши шифохонага ётқизилган, улардан 15 нафари оғир аҳволда. У қурбонлар сони яна ошиши мумкинлигини истисно этмаган. 

“Тўқнашув жуда кучли бўлган, яна қурбонлар топилиши мумкин. Вайрон бўлган вагонларни ажратиш учун оғир техникадан фойдаланилади”, деган Морено.  

“El Pais” газетаси хабарига кўра, Мадриддан Уэльвага кетаётган 27 ёшли поезд машинисти ҳам ҳалок бўлган. Икки поездда жами тахминан 400 йўловчи бўлган. Уларнинг аксарияти дам олиш кунидан сўнг Мадридга ёки ундан қайтаётган испанлар эди. Январь ойида сайёҳлик мавсуми бўлмагани сабабли, поезддагиларнинг неча нафари сайёҳ бўлгани аниқ эмас. 

“Жароҳатланганлар жуда кўп. Ҳали ҳам титраяпман”, деган Мадридга кетаётган йўловчилардан бири.

Иккинчи поезд йўловчиларидан бири ҳам давлат телеканали TVE’га интервью берган. 

“Одамлар қичқирарди, сумкалар жавонлардан қулаб тушди. Мен тўртинчи вагонда эдим, охиргисида ва шу боис омон қолдим”, деган у. 

“El Pais” маълумотига кўра, “Renfe” компаниясига тегишли иккинчи поезд тўқнашув пайтида соатига 200 км тезликда ҳаракатланаётган бўлган. Биринчи поезднинг тезлиги номаълум.

Испания транспорт вазири Оскар Пуэнтенинг айтишича, ҳалокат сабаби ҳозирча аниқланмаган. У тўғри темирйўл участкасида бундай ҳодиса юз бергани “жуда ғалати” эканини таъкидлаган. Ушбу темирйўл қисми 2025 йил май ойида янгиланган. 

Пуэнтенинг айтишича, ҳалок бўлганлар ва жароҳатланганларнинг аксарияти иккинчи поезднинг дастлабки икки вагонида бўлган. Биринчи вагонда 37 киши, иккинчисида 16 киши бўлган. Малагадан Мадридга кетаётган “Iryo” поездида 300 дан ортиқ, “Renfe”га тегишли поездда эса 100 га яқин йўловчи бўлган. 

Испания Бош вазири Педро Санчес ҳам бугун, 19 январь кунги режасини бекор қилиб, фожиа билан шуғулланишини билдирган. Қирол ва қиролича ҳам вазиятни хавотир билан кузатаётгани айтилмоқда. 

Маҳаллий телевидение Адамусда йўловчилар учун вақтинчалик марказ ташкил этилганини, маҳаллий аҳоли озиқ-овқат ва кўрпа-тўшак олиб келганини кўрсатган. Кечаси ҳаво ҳарорати 6 градус атрофида бўлган. 

Маълум қилинишича, ҳозирда Мадрид–Андалусия йўналишидаги барча поезд қатновлари вақтинча тўхтатилган.

Эслатиб ўтамиз, 2025 йилнинг 30 декабрь куни Перуда сайёҳларни қадимги инклар шаҳри Мачу-Пикчуга олиб кетаётган икки поезднинг қарама-қарши йўналишда тўқнашуви оқибатида 1 киши ҳалок бўлгани ва 30 дан ортиқ одам жароҳатлангани ҳақида хабар берилган эди.