Испания 14 йиллик рекордини янгилади

Испания терма жамоаси 2024 йилда барча расмий мусобақаларда ўтказилган 17 та ўйиндан 14 тасида ғалаба қозонди, бу терма жамоа тарихидаги мутлақ рекорд ҳисобланади. Бу ҳақда “Livescore” хабар берди.

Жамоа 19 ноябрга ўтар кечаси ўз уйида Швейцарияни мағлуб этиб, янги рекорд ўрнатди. Испания терма жамоаси учун аввалги энг яхши натижа 2010 йил бўлган, ўшанда жамоа 17 ўйиннинг 13 тасида ғалаба қозонган (битта дуранг ва учта мағлубият). Бундан ташқари, 2010 йилда испанлар Жанубий Африкада ўтказилган Жаҳон чемпионатида ғолиб чиққан.

Қайд этиш жоиз, Испания терма жамоаси 2024 йилда Германияда бўлиб ўтган Европа чемпионатида ғолиб чиққанди. Миллатлар лигасида жамоа 16 очко жамғариб, ўз гуруҳида ишончли ғалаба қозонди. Испанлар энг яқин таъқибчиси Дания терма жамоасини саккиз очкога ортда қолдирди.

Испания терма жамоаси учун 2024 йилдаги ягона мағлубият 23 март куни бўлиб ўтган Колумбия билан ўртоқлик учрашувида (0:1) юз берганди.